'मुस्लिम महिलांनी जीमला जावं, पण...'

मटा ऑनलाइन वृत्त | सहारनपूर

मुस्लिम महिलाही जीमला जाऊ शकतात, पण त्यासाठी त्यांनी काही अटी-शर्तींचं पालन करायला हवं, असं दारुल उलूम देवबंदनं स्पष्ट केलं आहे. महिला जीममध्ये गेल्या तरी त्यांचं अंग पूर्णपणे झाकलं गेलं पाहिजे, अशी अटही त्यांनी ठेवली आहे.

इस्लाममध्ये मुस्लिम महिलांना जीममध्ये जाण्याची परवानगी आहे. पण तेथे गेल्यास त्यांनी काही गोष्टी ध्यानात ठेवायला पाहिजेत, असं मत 'देवबंद' उलेमा मुफ्ती मेहंदी हसन ऐनी यांनी मांडलं. जीममध्ये काही गैर होत नाही ना, हेही पाहायला हवं. तेथे गाणी वाजवली जातात का? महिला ट्रेनर आहेत की नाहीत? याची खात्री करून घेतली पाहिजे, असंही त्यांनी म्हटलं. महिला तंदुरुस्तीसाठी जीममध्ये जात असल्यास त्याला इस्लाममध्ये मान्यता असू शकते, असं मत मदरसा जामिया हुसैनियाचे मुफ्ती तारिक कासमी यांनी म्हटलं आहे. जीममध्ये जाण्यास काहीच हरकत नाही, पण त्यासाठी काही अटी आहेत. जीममध्ये पुरुष नसावेत, तसेच त्याठिकाणी गाणी वाजवली जाऊ नयेत, पडद्यांची व्यवस्था असावी तसेच महिलांचं संपूर्ण अंग झाकलेलं असावं, असंही ते म्हणाले.