मुस्लिम योग शिक्षिकेच्या घरावर दगडफेक

मटा ऑनलाइन वृत्त । रांची

केवळ योगा शिकविते म्हणून रांचीच्या हटिया परिसरात राहणाऱ्या एका मुस्लिम योग शिक्षिकेच्या घरावर दगडफेक करण्यात आल्याची धक्कादायक घटना समोर आली आहे. राफिया नाज असं या शिक्षिकेचं नाव असून या घटनेनंतर तिच्या घराबाहेर पोलीस बंदोबस्तात वाढ करण्यात आली आहे.

शुक्रवारी एका चॅनेलवर राफियाची मुलाखत झाली. त्यात तिने योग शिकवून आपला उदरनिर्वाह करत असल्याचं सांगितलं. राफिया सार्वजनिकरित्या मंचावर योग शिकवित असल्यानं राग आल्यामुळे मुस्लिम समाजातील काही लोकांनी तिच्या घरावर दगडफेक केली. तिने सार्वजनिकपणे योग शिकवू नये म्हणून काही लोकांनी तिला धमकीही दिली होती. त्याविरोधात तिने रांची पोलीस ठाण्यात तक्रारही नोंदविली होती, असं रांचीचे पोलीस उपाधीक्षक विकासचंद्र श्रीवास्तव यांनी सांगितलं. दरम्यान, राफियाच्या घरावर दगडफेक झाल्यानंतर तिच्या घराभोवती पोलिसांचा बंदोबस्त वाढविण्यात आल्याचंही त्यांनी स्पष्ट केलं. सध्या राफियाच्या घराभोवती शीघ्र कृती दलाच्या दोन तुकड्या तैनात करण्यात आल्या असून पोलीस उपाधीक्षक विकास पांड्ये स्वत: त्यावर देखरेख करत आहेत. राफियाने योगगुरू बाबा रामदेव यांच्या सोबतही योग शिबिरांमध्ये अनेकदा भाग घेतला आहे.