हिंदूंसाठी मुस्लिमानं केली मुस्लिमाची तक्रार

मटा ऑनलाइन वृत्त । राजकोट

देशात विविध ठिकाणी सांप्रदायिक मुद्द्यावरून हिंसाचाराच्या घटना घडत असतानाच असा प्रकार घडून वातावरण कलुषित होऊ नये यासाठी मुस्लिम नागरिकांनी स्वधर्मीयाविरोधातच तक्रार दाखल केल्याची घटना गुजरातमधील तिंबी गावात घडली आहे.

चॅम्पियन्स ट्रॉफीच्या अंतिम सामन्यात भारताला पराभूत केल्यानंतर पाकिस्तानचे कौतुक करणारी फेसबुक पोस्ट टाकणाऱ्या युवकाविरोधात मुस्लिमांनीच तक्रार नोंदवत जातीय सलोख्याचे एक उदाहरण समोर ठेवले आहे. या पोस्टमुळे हिंदूंच्या भावना दुखावल्या जाऊन सांप्रदायिक तेढ निर्माण होण्याची शक्यता असल्याने गावकऱ्यांनी हे पाऊल उचलले.

गुजरातमधील अमरेली जिल्ह्यातील तिंबी गावात गेल्या अनेक वर्षांपासून हिंदु-मुस्लिम नागरिक गुण्यागोविंदाने राहत आहेत. एखादी पोस्ट वा वक्तव्यामुळे गावातील शांतता, सलोखा बिघडू नये अशी गावकऱ्यांची इच्छा आहे. त्यामुळेच मुस्लिम समाजाचे नेते कालू संधि यांनी साहिल खान या युवकाविरोधात तक्रार नोंदवल्यानंतर त्याच्यावर गुन्हा दाखल करण्यात आला.

पोलिसांनी दिलेल्या माहितीनुसार, साहिल हा त्याच्या मामाला भेटण्यासाठी तिंबी येथे आला होता, तेथे आठवडाभर राहून तो परत गेला. मात्र चॅम्पियन्स ट्रॉफीतील अंतिम सामन्यात पाकिस्तानने विजय मिळवल्यानंतर त्याने फेसबुकवर एक पोस्ट लिहिली. दोन-तीन दिवसांपूर्वी गावातील एका नागरिकाने ती पोस्ट वाचली. त्याच्या या लिखाणामुळे हिंदू धर्मीयांच्या भावना दुखावतील असे वाटल्यामुळे मुस्लिम नागरिकांनी त्याच्याविरोधात तक्रार दाखल करण्याचा निर्णय घेतला. पोलीस सध्या साहिलचा मोबाइल ट्रॅक करून त्याचा शोध घेत असून लवकरच त्याला चौकशीसाठी ताब्यात घेण्यात येईल.