'मुस्लिमांवर होणारे खोटे आरोप चिंताजनक'

मटा ऑनलाइन वृत्त । अलीगड

मुस्लिमांवर होणारे दहशतवादाचे खोटेनाटे आरोप व त्यामुळं त्यांना भोगाव्या लागणाऱ्या परिणामांबद्दल केंद्रीय कायदांमंत्री सदानंद गौडा यांनी चिंता व्यक्त केली आहे. 'अशा निराधार आरोपांपासून मुस्लिमांचं संरक्षण करण्यासाठी कायद्यात बदल करण्याचा विचार सरकार करत आहे,' असंही गौडा यांनी स्पष्ट केलं.

अलीगड येथे आयोजित 'विकास पर्व' कार्यक्रमात गौडा बोलत होते. 'दहशतवादी घटनांच्या चौकशीसाठी पकडण्यात येणाऱ्या संशयितांशी पोलिसांनी संवेदनशीलतेनं वागावं, अशी सरकारची भूमिका असल्याचं केंद्रीय गृहमंत्री राजनाथ सिंह यांनी गेल्याच आठवड्यात सांगितलं होतं. तोच धागा पकडत गौडा यांनी यासंबंधातील कायद्यात सुधारणा करण्याचं सुतोवाच केलं. कायद्यात सुधारणा करण्यासाठी एक समिती बनविली जाणार असून सर्वोच्च न्यायालयाचे न्यायाधीश या समितीचे अध्यक्ष असतील, असं गौडा म्हणाले. चुकीच्या आरोपांची शिकार झालेल्या मुस्लिमांचं निर्दोषत्व सिद्ध होईपर्यंत अनेक वर्षे निघून जातात. त्यामुळं त्यांना पुन्हा समाजाशी समरस होणं अवघड जातं. समाजही त्यांना स्वीकारण्यास कचरतो,' असंही ते म्हणाले. 'शरण येणाऱ्या दहशतवाद्यांच्या पुनर्वसनाठी आपल्याकडं नियमावली आहे, पण खोट्या आरोपांचा सामना करावा लागणाऱ्यांना कुठलंही संरक्षण नाही,' अशी खंतही त्यांनी व्यक्त केली.

बाबरी स्फोट प्रकरणात पकडण्यात आलेल्या निसारुद्दीन अहमद यानं २३ वर्षे तुरुंगात काढल्यानंतर त्याला निर्दोष घोषित करण्यात आलं. मोहम्मद आमीर यानं १४ वर्षे तुरुंगात काढल्यानंतर त्याला १९ आरोपांपैकी १७ आरोपांमध्ये निर्दोष ठरवण्यात आलं. ही उदाहरणं नुकतीच पुढं आली आहेत. या पार्श्वभूमीवर गौडा यांनी मांडलेली ही भूमिका महत्त्वाची मानली जात आहेत.