'राम मंदिराशेजारी मुस्लिमांना मशीद नको आहे'

मटा ऑनलाइन वृत्त। नवी दिल्ली

'मुस्लिमांना देखील आयोध्येतील वादग्रस्त जागेवर मशीद नको आहे', असा दावा राष्ट्रीय स्वयंसेवक संघाचे वरिष्ठ नेते आणि मुस्लिम जागरण मंचाचे प्रमुख इंद्रेश कुमार यांनी केला आहे. आयोध्येतील वादग्रस्त जागा ही मुस्लिमांच्या दृष्टीने 'नापाक' आहे. याच कारणामुळ मुस्लिमांना या जागेवर मशीद नको आहे असे स्पष्टीकरणही इंद्रेश कुमार यांनी दिले आहे.

इंद्रेश कुमार पुढे म्हणाले की, ही मशीद मुघल शासक बाबर याच्या नावाने तयार झाली होती. एखाद्या व्यक्तीच्या नावावर निर्माण झालेल्या मशीदीचा मुस्लिम स्वीकार करणार नाहीत. अशा प्रकारची मशीद 'नापाक' असेल असे इस्लामला मानणाऱ्यांचे म्हणणे आहे. याच कारणामुळे ते अशा मशीदीचा कधीही स्वीकार करणार नाहीत असेही इंद्रेश कुमार म्हणाले.

राम मंदिर निर्माण आंदोलन सुरू झाले असून शांती, सद्भाव, सत्य आणि राष्ट्रवादावर विश्वास असणारे अयोध्येत राम मंदीर व्हावे या मताचे आहेत असेही इंद्रेश कुमार म्हणाले.

दरम्यान, सुप्रीम कोर्टाने बाबरी मशीद विध्वंसप्रकरणी भाजपचे ज्येष्ठ नेते लालकृष्ण अडवाणी, मुरली मनोहर जोशी आणि उमा भारती यांच्याविरुद्ध कट रचल्याचे प्रकरण चालवण्याची सीबीआयला नुकतीच परवानगी दिली आहे.