मी आणि माझा पक्ष मोदींच्या पाठिशी: राहुल गांधी

मटा ऑनलाइन वृत्त । नवी दिल्ली

भारतीय लष्करानं पाकव्याप्त काश्मीरमध्ये सर्जिकल स्ट्राइक करून दहशतवादी अड्डे उद्ध्वस्त केल्यानंतर काँग्रेसचे उपाध्यक्ष राहुल गांधी यांनी पंतप्रधान नरेंद्र मोदींचे कौतुक केले आहे. मी आणि माझा पक्ष पंतप्रधान मोदींच्या पाठिशी आहे, अशी प्रतिक्रिया त्यांनी व्यक्त केली आहे.

राजकीय आखाड्यात पंतप्रधान मोदी आणि राहुल गांधी हे दोघेही एकमेकांचे कट्टर विरोधक आहेत. एकमेकांवर टीका करण्याची एकही संधी ते सोडत नाहीत. पण पाकव्याप्त काश्मीरमध्ये लष्करानं केलेल्या कारवाईनंतर राहुल गांधी यांनी पंतप्रधान मोदींच्या धाडसी निर्णयाचं तोंडभरून कौतुक केलं आहे. पंतप्रधान म्हणून नरेंद्र मोदींना जो निर्णय घ्यायला हवा होता, तो त्यांनी घेतलेला आहे, असंही राहुल गांधी म्हणाले.