राज्यमंत्रीपदाचा दर्जा, नागा साधूंची निदर्शने

भोपाळ: पाच साधूंना राज्यमंत्रीपदाचा दर्जा देण्याचा निर्णय मध्यप्रदेशचे मुख्यमंत्री शिवराजसिंह चौहान यांच्यासाठी डोकेदुखी ठरला आहे. मुख्यमंत्र्यांच्या या निर्णयाविरोधात विविध आखाड्यातील नागा साधूंनी जोरदार निदर्शने करत सरकारचा निषेध नोंदविला आहे.

यादगार-ए-शहाजहाँनी पार्कमध्ये या साधुंनी जोरदार निदर्शने केली. नर्मदा सेवा यात्रेतील भ्रष्टाराचार चव्हाट्यावर आणू नये म्हणूनच शिवराज सिंह चौहान यांनी या पाच साधूंना राज्यमंत्रीपदाचा दर्जा दिल्याचा आरोप नागा साधूंनी केला आहे. स्वामी वैराग्यानंद गिरी यांनी या साधूंच्या या मोर्चाचं नेतृत्व केलं. या साधूंना मुख्यमंत्र्यांच्या घरापर्यंत मोर्चा न्यायचा होता. पण त्यांना पोलिसांनी मध्येच अडविले. घोटाळ्याविरोधातील आवाज दाबण्यासाठीच साधुंना राज्यमंत्रीपदाचा दर्जा देऊन गप्प बसविले असल्याचा आरोपही या साधुंनी केला.

चौहान गेली १२ वर्ष मुख्यमंत्रीपदावर आहेत. या काळात त्यांना साधूंना राज्यमंत्रीपदाचा दर्जा देता आला नाही, मग आताच साधूंना राज्यमंत्रीपदाचा दर्जा का दिला?, असा सवाल करतानाच ६ कोटी वृक्षांचं रोपण करण्यात आल्याच्या सरकारच्या दाव्यावरही नागा साधूंनी प्रश्नचिन्ह उपस्थित केले आहेत.