नामिबियातून आणलेल्या मादी चित्त्याचा कुनोमध्ये मृत्यू, साशाला झाला होता गंभीर आजार

भोपाळ: मध्य प्रदेशातील कुनो राष्ट्रीय उद्यानात नामिबियातून आणलेल्या चित्त्यांपैकी मादी चित्ता ‘साशा’ हिचा किडनीच्या आजारामुळे मृत्यू झाला आहे. एका वरिष्ठ वनअधिकाऱ्याने ही माहिती दिली.

१७ सप्टेंबर २०२२ रोजी नामिबियातून कुनो राष्ट्रीय उद्यानात हलवण्यात आलेल्या आठ चित्त्यांमध्ये साडेचार वर्षांच्या ‘साशा’चा समावेश होता. साशा २२ जानेवारीपासून किडनीच्या आजाराने त्रस्त होती. भारतात स्थलांतरित करण्यापूर्वी साशाला किडनीचा आजार होता. नामिबियामध्ये तिच्यावर ऑपरेशनही करण्यात आले होते. मात्र, ही गोष्ट लपवून ठेवण्यात आली होती, असा दावा करण्यात येत आहे. या वर्षी २२ ते २३ जानेवारी दरम्यान साशा आजारी पडली. त्यानंतर तिला दुसऱ्या ठिकाणी शिफ्ट करण्यात आलं होतं. साशा जेवणही करत नव्हती व सतत अशक्त होत होती. त्यानंतर कुनो नॅशनलपार्कमधील तीन डॉक्टर आणि भोपाळमधून आलेल्या डॉक्टरांच्या टीमने साशाची तपासणी केली असता तिला किडनी इन्फेक्शन झाल्याचं समोर आलं होतं.

Pune News: पुण्यात भीषण अपघात! पीक अपने ८ जणांना चिरडलं, पाच जण जागीच ठार
मध्य प्रदेशचे प्रधान मुख्य वनसंरक्षक (पीसीसीएफ, वन्यजीव) जे. एस. चौहान यांनी वृत्तसंस्थेला सांगितले की, ‘मादी चित्ता ‘साशा’चा मृत्यू मूत्रपिंडाच्या समस्येमुळे झाला. तिची क्रिएटिनिन पातळी खूप जास्त होती.’ चौहान यांनी सांगितले की, मादी चित्ता सुमारे सहा महिन्यांपासून बरी होत नव्हती आणि नुकतेच तिला उपचारासाठी पुन्हा विलगीकरणात ठेवण्यात आले होते. त्याने सांगितले की ‘साशा’ची क्रिएटिनिन पातळी ४००च्या वर होती. यामुळे तिचा मृत्यू झाला. याबाबत अधिक तपशीलाची प्रतीक्षा असल्याचे त्यांनी सांगितले.

घर घेण्याचं स्वप्न पाहताय?; दोन वर्षांत घरांच्या किंमतीत २० लाखांनी वाढ, ही कारणं महत्त्वाची
दरम्यान, मागील वर्षी १७ सप्टेंबर रोजी पंतप्रधान नरेंद्र मोदी यांच्या वाढदिवसाच्या दिवशी नामिबियातून आठ चित्ते भारतात आणण्यात आले होते. यात ५ मादी आणि ३ नर यांचा समावेश आहे. मध्य प्रदेशमधील कुनो नॅशनल पार्कमध्ये सोडण्यात आले होते. हे सर्व आठ चित्त्यांनी भारतातील हवामानाशी जुळवून घेतले होते. चित्ते शिकारही करु लागले होते. मात्र, त्यापैकी साशाला गंभीर आजार झाल्याने तिचा मृत्यू झाला.

दक्षिण अफ्रीकेतून भारतात आणले १२ चित्ते

१८ फेब्रुवारी रोजी दक्षिण अफ्रीकेतून आणखी १२ चित्ते आणण्यात आले होते. यामध्ये ७ नर आणि ५ मादी यांचा समावेश आहे. या सर्व चित्त्यांना कुनो नॅशनल पार्कमध्ये सोडण्यात आले आहे.