‘मोदी-शहा स्थलांतरित’

नवी दिल्ली: काँग्रेसचे ज्येष्ठ नेते अधीर रंजन चौधरी यांनी पुन्हा एकदा वादग्रस्त विधान करताना पंतप्रधान नरेंद्र मोदी आणि भाजपचे राष्ट्रीय अध्यक्ष अमित शहा यांना स्थलांतरित म्हणून संबोधले आहे.

'हा देश सर्वांचा आहे. हा देश कुण्या एकट्या व्यक्तीच्या मालकीचा नाही. येथे सर्वांना समान अधिकार आहे,' असे सांगतानाच 'पंतप्रधान नरेंद्र मोदी आणि अमित शहा हे दोघेही स्थलांतरित आहेत. तुमचे घर गुजरातमध्ये आहे आणि तुम्ही दिल्लीत आला आहात. तुम्ही स्वत: स्थलांतरित आहात, वैध-अवैध या गोष्टी नंतर पाहू,' असे अधीर रंजन चौधरी यांनी एनआरसीच्या मुद्द्यावर बोलताना सांगितले. केंद्र सरकारने संपूर्ण देशात 'एनआरसी' लागू करण्याचे संकेत दिले आहेत. स्वत: केंद्रीय गृहमंत्री अमित शहा यांनी आसामनंतर संपूर्ण देशात 'एनआरसी' लागू करण्यात येणार असल्याचे स्पष्ट केले आहे. त्यावर माध्यमांशी संवाद साधताना चौधरी यांनी ही टीका केली. 'मुसलमानांना पळवून लावू हे त्यांना दाखवून द्यायचे आहे. पण, मुसलमानांना पळवून लावण्याची त्यांची हिंमत नाही. हा देश सर्वांचा आहे. या देशातील हिंदू-मुस्लिम सर्व समान आहेत. सर्वांच्या सहकार्याने आणि त्यागाने हा देश बनला आहे. पण, त्यांना आम्ही या देशात हिंदूंनाच ठेवू आणि मुस्लिमांना पळवून लावू हे दाखवून द्यायचे आहे,' असे चौधरी यांनी सांगितले.