मोदींना तर भारतरत्न द्यायला हवा!- केजरी

मटा ऑनलाइन वृत्त । नवी दिल्ली

राष्ट्रवादी काँग्रेसचे सर्वेसर्वा आणि माजी केंद्रीय मंत्री शरद पवार यांना पद्मविभूषण पुरस्कार जाहीर झाल्यानंतर दिल्लीचे मुख्यमंत्री अरविंद केजरीवाल यांनी
पंतप्रधान नरेंद्र मोदींवर निशाणा साधला आहे. शरद पवार यांना पद्मविभूषण देण्याचं धाडस केल्याबद्दल मोदींना भारतरत्न मिळायला हवा, असा टोला केजरीवाल यांनी ट्विटरवरून हाणलाय आणि एका दगडात दोन पक्षी मारलेत.

अत्यंत प्रतिष्ठेच्या पद्म पुरस्कारांची घोषणा काल, प्रजासत्ताक दिनाच्या पूर्वसंध्येला करण्यात आली. देशातील दुसऱ्या क्रमांकाचा सर्वोच्च नागरी सन्मान असलेला पद्मविभूषण पुरस्कार यंदा सात जणांना जाहीर झालाय. या दिग्गजांमध्ये शरद पवार यांचाही समावेश आहे. त्याबद्दल अरविंद केजरीवाल यांनी सखेद आश्चर्य व्यक्त केलं आहे.

'शरद पवार देश में भ्रष्टाचार उन्मूलन राजनीति के लिए भारत रत्न के हक़दार हैं ...पद्म विभूषण उनके क़द के लायक नहीं... #अबकी बार शरद पवार' हे खोचक ट्विट अरविंद केजरीवाल यांनी रिट्विट केलं आहे. तर, एका ट्विटवर प्रतिक्रिया देताना त्यांनी पवारांसोबतच मोदींनाही लक्ष्य केलंय.

शरद पवार को पद्म विभूषण देने की हिम्मत दिखाने के लिए मोदी जी को भारत रत्न मिलना चाहिए https://t.co/z1417VKBcB — Arvind Kejriwal (@ArvindKejriwal) January 26, 2017 पंतप्रधान मोदींनी महाराष्ट्रातील विधानसभा निवडणुकीच्या प्रचारावेळी, एनसीपी म्हणजे नॅचरल करप्ट पार्टी असल्याची टीका केली होती. तसंच, राष्ट्रवादीचा उल्लेख भ्रष्टाचारवादी पक्ष असाही केला होता. असं असताना, त्याच पक्षाच्या नेत्यांना पद्मविभूषण कसा दिला जातो, असा प्रश्न आपचे नेते विचारत आहेत. दुसरीकडे, शिवसेनेसह अन्य पक्षांनी, पवारांच्या कृषी आणि सहकार क्षेत्रातील कार्याचा गौरव करत, त्यांना पद्मविभूषण देण्याच्या निर्णयाचं स्वागत केलं आहे.