मी यूपीचा दत्तक मुलगा!: मोदी

मटा ऑनलाइन वृत्त । हरदोई

'भगवान श्रीकृष्णाचा जन्म उत्तर प्रदेशात झाला आणि गुजरातला त्यानं कर्मभूमी बनवली. माझा जन्म गुजरातमध्ये झाला आणि उत्तर प्रदेशनं मला दत्तक घेतलं,' असं सांगतानाच, 'मी आई-वडिलांना विसरणारा मुलगा नाही. हा दत्तक मुलगा उत्तर प्रदेशाची पूर्ण काळजी वाहील,' अशी ग्वाही पतंप्रधान नरेंद्र मोदी यांनी आज दिली.

उत्तर प्रदेशातील तिसऱ्या टप्प्याच्या निवडणूक प्रचारासाठी हरदोई इथं घेतलेल्या सभेत ते बोलत होते. मोदी यांनी यावेळी समाजवादी पक्ष व काँग्रेसवर जोरदार हल्ला चढवला. 'उत्तर प्रदेशात कायदा-सुव्यवस्थेचं पालन करण्याऐवजी राजकारण केलं जातं. आपला-परका असा भेदभाव केला जातो. याच राज्यात सर्वाधिक खून होतात. सामूहिक बलात्काराच्या घटनासुद्धा यूपीतच जास्त होतात. हे काम आहे की 'कारनामा' असा टोला मोदी यांनी अखिलेश यादव यांना हाणला. 'लोकांच्या सुरक्षेशिवाय कधी, कुणाचं भलं होऊ शकत नाही,' असा चिमटाही त्यांनी अखिलेश यांना काढला.

काही दिवसांपूर्वी 'सर्जिकल स्ट्राइक'चे पुरावे मागणाऱ्या काँग्रेसवरही मोदींनी हल्ला चढवला. 'इस्रोनं घेतलेल्या अंतराळ झेपेचं जगभरात कौतुक होत आहे. कोणीही याचा पुरावा मागितला नाही. मात्र, सर्जिकल स्ट्राइकचा पुरावा आमच्याकडं मागितला गेला. त्यामुळं यावेळी 'इस्रो'च्या शास्त्रज्ञांशी बोलताना मी त्यांना सावध केलं की उपग्रहाच्या प्रक्षेपणाचे पुरावे ठेवा. कोण, कधी मागेल सांगता यायचं नाही,' असंही मोदी म्हणाले.

'बिहार आणि यूपीची गरिबी दूर झाली तर देशाची गरिबी दूर होईल. पण समाजवादी, काँग्रेस आणि बसपपासून मुक्त केल्याशिवाय यूपीचा विकास होऊ शकत नाही. यापैकी कुठल्याही पक्षानं कधी यूपीच्या सर्वांगीण विकासाचा विचार केला नाही. यांना दूर केल्याशिवाय यूपीचं भाग्य बदलणार नाही,' असं मोदी म्हणाले.