कोविंद यांचा अर्ज दाखल

म. टा. विशेष प्रतिनिधी, नवी दिल्ली

पंतप्रधान नरेंद्र मोदी, भाजपचे राष्ट्रीय अध्यक्ष अमित शहा, लालकृष्ण अडवाणी, मुरलीमनोहर जोशी, प्रकाशसिंग बादल यांच्यासह भाजप-रालोआशासित १४ राज्यांचे मुख्यमंत्री तसेच तमिळनाडू आणि तेलंगणचे मुख्यमंत्री, अनेक केंद्रीय मंत्री आणि खासदारांच्या उपस्थितीत भाजप-रालोआचे राष्ट्रपतिपदाचे उमेदवार रामनाथ कोविंद यांनी शुक्रवारी संसद भवनात उमेदवारी अर्ज दाखल केला. शिवसेनेने मात्र या कार्यक्रमाकडे पाठ फिरवली.

कोविंद यांचा अर्ज दाखल करण्यासाठी पावणे बाराचा मुहूर्त होता. मात्र तो टळून गेल्यानंतर पंतप्रधान मोदी आले. त्यानंतर १० मिनिटांतच संसदेच्या ग्रंथालयातून कोविंद यांनी उपस्थित नेत्यांसह संसद भवन गाठले. कोविंद यांचे तीन उमेदवारी अर्ज दाखल करण्यात आले. सत्ताधारी ऐक्याचे प्रतीक ठरलेल्या या सोहळ्याला शिवसेनेचा प्रतिनिधी हजर नव्हता. हा प्रकार गैरसमजातून घडला असल्याचा दावा भाजपच्या ज्येष्ठ नेत्यांनी केला. कोविंद यांच्या उमेदवारी अर्जांवर अनंत गीते, आनंद अडसूळ आणि संजय राऊत यांनी संसदीय कामकाज मंत्री अनंतकुमार यांच्या निवासस्थानी जाऊन स्वाक्षऱ्या केल्या होत्या. कोविंद २३ जूनला अर्ज दाखल करणार असल्याचे सर्वश्रुत होते. परंतु शिवसेनेला कदाचित अधिकृत निमंत्रणाची प्रतीक्षा असावी, असे भाजपच्या नेत्यांचे म्हणणे आहे.

राज्यपाल झाल्यापासून मी कोणत्याही पक्षाचा उरलो नाही. देशाची घटना सर्वोच्च असून त्याचे पावित्र्य कायम राखण्याची जबाबदारी मी पार पाडेन. राष्ट्रपतिपदाची प्रतिष्ठा कायम राखण्यासाठी आपण सर्वतोपरी प्रयत्न करू, अशी ग्वाही देत कोविंद यांनी त्यांचे समर्थन करणाऱ्या सर्व पक्षांचे आभार मानले. २५ जूनला कोविंद उत्तर प्रदेशचा दौरा करणार असून केंद्रीय भूपृष्ठ व जलवाहतूक मंत्री नितीन गडकरी त्यांच्यासोबत असतील.