जाधव यांचा ठावठिकाणा माहीत नाही : परराष्ट्र मंत्रालय

मटा ऑनलाइन वृत्त । नवी दिल्ली

'हेरगिरीच्या आरोपावरून फाशीची शिक्षा ठोठावण्यात आलेले कुलभूषण जाधव यांचा ठावठिकाणा वा त्यांच्या प्रकृतीबाबत पाकिस्तानने भारताला कोणतीही माहिती दिलेली नाही' असे परराष्ट्र मंत्रालयाचे प्रवक्ते गोपाल बगलय यांनी स्पष्ट केले. भारताने वारंवार विनंती करूनही पाकिस्तानने जाधव यांची भेट घेण्याची परवानगी दिली नाही, असेही त्यांनी सांगितले.

' जाधव यांची भेट घेण्यासाठी भारतीय उच्चायुक्तालयाने पाकिस्तानातील अधिकाऱ्यांशी १३ वेळा संपर्क साधला, मात्र त्यांनी कोणताही प्रतिसाद दिला नाही. त्यामुळे आमच्याकडे जाधव यांच्या सद्य स्थितीबाबत कोणतीही माहिती नाही' असे बगलय यांनी नमूद केले.

जाधव निर्दोष असल्याचाही त्यांनी पुनरुच्चार केला. 'जाधव हे निवृत्त नौदल अधिकारी असून ते निष्पाप आहेत. त्यांच्यासोबत जे काही घडले ते न्याय व आंतरराष्ट्रीय नियमांच्या विरोधात आहे. गेल्या वर्षभरापासून आम्ही त्यांच्या अपहरणबाबत इराणसोबत चर्चा करत आहोत, मात्र तेथूनही कोणतीही माहिती मिळाली नाही’ असेही त्यांनी सांगितले.