नीता अंबानी यांना मिळाली VVIP सुरक्षा

मटा ऑनलाइन वृत्त । नवी दिल्ली

रिलायंस इंडस्ट्रीज लिमिटेडचे अध्यक्ष मुकेश अंबानी यांना 'झेड' दर्जाची सुरक्षा मिळालेली असतानाच आता त्यांच्या पत्नी नीता अंबानी यांनाही सरकारकडून 'वाय' दर्जाची 'व्हीव्हीआयपी' सुरक्षा देण्यात आली आहे.

केंद्रीय सुरक्षा पथकाकडून तयार करण्यात आलेल्या एका रिपोर्टमध्ये नीता अंबानी यांना विशेष सुरक्षा देण्याची शिफारस करण्यात आली होती. रिपोर्टमधील शिफारसीची दखल घेत केंद्रीय गृहमंत्रालयाने नीता अंबानी यांना 'वाय' दर्जाची सुरक्षा देण्यास मंजुरी दिली आहे.

नीता अंबानी यांना केंद्र सरकारकडून 'वाय' दर्जाची सुरक्षा देण्यात आल्याने त्यांच्या सुरक्षेसाठी १० सशस्त्र सीआरपीएफ कमांडो तैनात करण्यात आल्याची माहिती एका वरिष्ठ अधिकाऱ्याने दिली.