पाकिस्तानला झटका; सार्क परिषद रद्द?

 मटा ऑनलाइन वृत्त । नवी दिल्ली

भारतासह चार देशांनी पाकिस्तानात नोव्हेंबरमध्ये होणाऱ्या दक्षिण आशियाई देशांच्या शिखर परिषदेवर बहिष्कार टाकल्यानंतर ही परिषदच रद्द होण्याची शक्यता आहे.

यंदाच्या सार्क परिषदेचे यजमानपद पाकिस्तानला मिळाले असून नोव्हेंबरमध्ये इस्लामाबादमध्ये ही परिषद होत आहे. सार्कच्या एका सदस्य एका देशाकडून भारतात दहशतवादी कारवाया केल्या जात आहेत. तसेच भारताच्या अंतर्गत बाबींमध्ये हा देश ढवळाढवळ करत आहे. या प्रकारांमुळे ही परिषद यशस्वी होणार नाही, असे वातावरण या देशाने निर्माण केले आहे. त्यामुळे आम्ही या परिषदेत सहभागी होणार नाही, असे भारताने मंगळवारी रात्री नेपाळला कळवले. नेपाळकडे यंदाच्या या परिषदेचे अध्यक्षपद आहे.

भारतासह अफगाणिस्तान, बांगलादेश आणि भूतान या आशियाई देशांनीही या परिषदेतून अंग काढण्याचा निर्णय घेतला आहे. त्यामुळे सार्क परिषद रद्द झाल्यास पाकसाठी मोठा झटका ठरणार आहे.