उद्यापासून महागाईत भर, नवे कर लागू होणार

नवी दिल्ली: उद्या रविवारपासून नव्या आर्थिक वर्षाला सुरुवात होणार असल्याने केंद्र सरकारने अर्थसंकल्पात मांडलेले कर प्रस्ताव लागू होणार आहेत. त्यामुळे नोकरदार आणि उद्योजकांना आयकरावर एक टक्का उपकर आणि शेअर विक्रीच्या भांडवली नफ्यावर कर द्यावा लागणार आहे. त्याचप्रमाणे आरोग्य आणि शिक्षणावरही चार टक्के उपकर भरावा लागणार असल्याने उद्यापासून देशावासियांना महागाईचे चटके बसणार आहेत.

केंद्रातील मोदी सरकारने नव्या आर्थिक वर्षासाठी अर्थसंकल्पात जे कर प्रस्ताव मांडले होते. ते प्रस्ताव उद्यापासून लागू होणार आहेत. त्यामुळे उद्याचा रविवार देशवासियांसाठी महागाई घेऊन येणारा ठरणार आहे. केंद्र सरकारने शिक्षण आणि आरोग्य अधिभारात १ टक्क्याने वाढ केली असून त्यामुळे प्रत्येक बिल वाढणार आहे. याचाच अर्थ तुम्ही जे जे खरेदी कराल त्या त्या बिलावर १ टक्के अधिभार आकारण्यात येणार आहे. पूर्वी हा अधिभार ३ टक्के होता, तो आता ४ टक्के असणार आहे. त्याचप्रमाणे शेअर विक्रीवरच्या भांडवली नफ्यावर कर आकारला जाणार असून ४ टक्के कर आरोग्य आणि शिक्षण सेसवर असणार आहे. त्यामुळे सर्वच सेवा महागणार आहेत. दरम्यान ५० हजारापर्यंतच्या व्याजावरच्या आयकरात सूट देऊन केंद्र सरकारने ज्येष्ठ नागरिकांना दिलासा दिला आहे.

१ एप्रिलपासून ई-वे बिल प्रणाली लागू होणार असून ५० हजार रुपयांपेक्षा जास्त मूल्यांच्या आंतरराज्य मालवाहतुकीवर इलेक्ट्रॉनिक्स बिल आकारण्यात येणार आहे. विशेष म्हणजे जीएसटीमध्ये ई-वे बिल प्रणालीची तरतूद असून यामुळे कर संकलनात वाढ होईल, असा अंदाज वर्तविण्यात येत आहे.

काय होणार बदल

>> शेअर विक्रीवर दीर्घकालीन भांडवली नफा

>> आयकरावर अतिरिक्‍त एक टक्के उपकर भरावा लागणार

>> ज्येष्ठ नागरिकांना ५० हजारापर्यंत व्याजावर आयकरात सूट

>> ई-वे बिल प्रणालीला प्रारंभ