रस्त्यांवर पार्किंगला आळा घाला

नवी दिल्ली : राजधानी दिल्ली भीषण प्रदूषणाच्या स्थितीला तोंड देत असतानाच, रस्त्यांवरील वाहतूक कोंडी फोडण्यासाठी रस्त्यांवरील पार्किंगला आळा घालण्याचे आणि वाहनांसाठी पुरेशी पार्किंग सुविधा उपलब्ध करण्याचे निर्देश राष्ट्रीय हरित लवादाने दिल्ली सरकार आणि महापालिकांना दिले.

वाहतूक कोंडी सोडवण्यासाठी लवादाने याआधी दिलेल्या आदेशांची अमलबजावणी न केल्याबद्दल न्या. स्वतंत्र कुमार यांच्या अध्यक्षतेखालील हरित लवादाने या यत्रणांना फटकारले. ‘वाहनांसाठी तुम्ही पुरेशी पार्किंग सुविधा का निर्माण केली नाही? रस्त्यांवर दोन-तीन मार्गिकांवर पार्किंग करू देऊन झालेल्या कोंडीला तुम्ही जबाबदारी आहात. आपल्या कराराचा गैरवापर करणाऱ्या कंत्राटदारांची कंत्राटे तुम्ही रद्द का करत नाही? हे पार्किंगचे लोक अधिकाऱ्यासारखे वागतात आणि वाहतूक पोलिस केवळ बघत बसतात,’ असे लवादाने फटकारले.जर नवीन वाहनांच्या नोंदणीला परवानगी असेल, तर त्यांच्यासाठी पुरेशी पार्किंगची जागा उपलब्ध करून द्यायलाच हवी, असे लवादाने सुनावले.