पुलवामा हल्ल्याप्रकरणी काश्मीरमधून बाप-लेकीला अटक

श्रीनगरः पुलवामा दहशतवादी हल्ल्याशीसंबंधित वडील आणि मुलीला राष्ट्रीय तपास यंत्रणेच्या (एनआयए) पथकाने अटक केलीय. पीर तारिक आणि इन्शा अशी त्यांची नावं आहेत. पीर आणि तारिक हे पुलवामा हल्ल्यातील कटाचे साक्षीदार आहेत. त्यांनी हल्ल्यासाठी दहशतवाद्याला मदत केली होती, असा त्यांच्यावर आरोप आहे. जम्मूतील विशेष कोर्टात त्यांना एनआयएने हजर केलं. सुनावणीत कोर्टाने त्यांना १० दिवसांची एनआयए कोठडी सुनावलीय.

गेल्या वर्षी म्हणजे १४ फेब्रुवारी २०१९ ला पुलवामामध्ये भीषण दहशतवादी हल्ला करण्यात आला होता. या हल्ल्यात सीआरपीएफचे ४० जवान ठार झाले होते. हा आत्मघाती बॉम्ब हल्ला होता. जैश ए मोहम्मदचा दहशतवादी आदिल अहमद दार याने कारमध्ये बॉम्ब ठेवून सीआरपीएफच्या बसला धडक दिली होती. यावेळी या बसमध्ये सीआरपीएफचे ४० जवान होते.

पुलवामा हल्ल्यानंतर जैश ए मोहम्मदने आदिलचा एक व्हिडिओ जाहीर केला होता. पुलवामा जिल्ह्यातील हाकरीपोरा येथील तारिकच्या घरातील हा व्हिडिओ होता. आरोपी तारिक आणि इन्शा यांनी दहशतवादी आदिलला आश्रय दिला होता. एनआयएने हाकरीपोरातील याच घरातून दोघांना अटक केली.