श्रीलंकेतील हल्लाप्रकरणी ‘एनआयए’चे भारतात छापे

वृत्तसंस्था, कोइमतूर

राष्ट्रीय तपास यंत्रणेने (एनआयए) बुधवारी काही ठिकाणी छापे टाकले. श्रीलंकेत चर्चवर नुकत्याच झालेल्या स्फोटांशी संबंधित काही धागे या शहरापर्यंत पोहोचल्याचे समजल्यानंतर ही कारवाई करण्यात आली. बॉम्बस्फोटातील सहभागींचा येथील काही जणांशी संपर्क असल्याचे उघड झाले आहे. त्यातून सात ठिकाणी शोधमोहीम राबवण्यात आली. पथकाने यापूर्वी केरळमधील 'इस्लामिक स्टेट मॉड्युल'शी संबंधित ठिकाणीही शोध घेतला आहे.

श्रीलंकेत २१ एप्रिलला ठिकठिकाणच्या चर्चवर दहशतवादी हल्ले झाले. नऊ आत्मघाती दहशतवाद्यांनी हे कृत्य केले. त्यात २५० जणांचा मृत्यू झाला. अनेक जण जखमी झाले. या हल्ल्यांची जबाबदारी 'आयएस'ने स्वीकारली आहे. श्रीलंकेतील 'नॅशनल तोव्हीत जमात' (एनटीजे) या स्थानिक दहशतवादी गटाने त्यासाठी मदत केल्याचे तपासात उघड झाले आहे. या दहशतवादी हल्ल्यानंतर भारताने दक्षिणेतील राज्यात सुरक्षाव्यवस्था कडक केली असून, हल्ल्यांशी अप्रत्यक्ष संबंधित काही जणांचा शोध घेतला जात असल्याचे सूत्रांनी सांगितले. कारवाईवेळी बंदोबस्त ठेवण्यात आला होता. मात्र, त्यात नेमके काय सापडले याबाबतची माहिती देण्यास स्थानिक सूत्रांनी असमर्थता व्यक्त केली.