वृत्तसंस्था, नवी दिल्ली
कर्नाटकचे काँग्रेस नेते आणि आमदार डी. के. शिवकुमार यांना दिल्ली न्यायालयाने बुधवारी नऊ दिवसांची कोठडी सुनावली. अंमलबजावणी संचालनालयाने (ईडी) शिवकुमार यांना १४ दिवसांची कोठडी देण्याची मागणी केली होती.
शिवकुमार यांना मनी लाँडरिंगप्रकरणी ईडीने मंगळवारी रात्री अटक केली होती. त्यांना बुधवारी विशेष न्यायमूर्ती अजयकुमार कुहार यांच्यासमोर हजर करण्यात आले. तत्पूर्वी, त्यांची रुग्णालयात तपासणी करण्यात आली. त्यानंतर ईडीने शिवकुमार यांची कोठडी आवश्यक असल्याचे सांगून १४ दिवस कोठडी देण्याची मागणी केली. शिवकुमार यांचे वकील अभिषेक मनू सिंघवी यांनी यास विरोध केला. 'शिवकुमार यांची यापूर्वी ३३ तास चौकशी झाली आहे, 'ते फरारी झाले नाहीत, ते कायम चौकशीसाठी हजर राहिले आहेत, ते पळून जाण्याचा धोका नाही,' अशी बाजू सिंघवी यांनी मांडली. त्यास ईडीने विरोध केला. कागदपत्रे तपासायची आहेत, बेकायदा मालमत्तांचा शोध घ्यायचा आहे, ते चौकशीत दिशाभूल करीत आहेत, असे सांगून ईडीने १४ दिवस कोठडी देण्याची मागणी केली. त्यावर न्या. कुहार यांनी नऊ दिवसांची कोठडी दिली. यावर शिवकुमार हे कर्नाटकच्या जनतेशी बोलू शकतात का, असा प्रश्न त्यांच्या वकिलांनी केला. त्यावर न्यायमूर्तींनी 'नाही' असे उत्तर दिले.
दरम्यान, शिवकुमार यांच्या अटकेच्या निषेधार्थ कर्नाटकात हिंसाचाराच्या घटना घडल्या. शिवकुमार यांच्या कनकपुरा मतदारसंघात बसवर दगडफेक करण्यात आली; तसेच रस्त्यात टायरही जाळण्यात आले.