'निर्भया'च्या दोषींना वेगवेगळी फाशी द्या, केंद्राची याचिका

नवी दिल्लीः निर्भयाच्या दोषींना एकाच वेळी फाशी नको. तर वेगवेगळी फाशी द्या, अशी मागणी केंद्र सरकारने सुप्रीम कोर्टात केलीय. या प्रकरणी सुप्रीम कोर्टाने ५ मार्चपर्यंत सुनावणी पुढे ढकललीय. यामुळे दोषींना ३ मार्चला फाशी होणार की नाही? असा प्रश्न पुन्हा उपस्थित झाला आहे.

निर्भयाच्या चार दोषींपैकी तिघांनी सर्व कायदेशीर पर्याय चाचपडून पाहिल्याने त्यांच्याकडे आता कुठलाही मार्ग उरलेला नाही. तर चौथा आरोप पवन हा कायदेशीर पेचात पडण्यास इच्छूक नाही. यामुळे दोषींना ३ मार्चला फाशी होणार अशी अपेक्षा व्यक्त केली जातेय.

निर्भयाच्या दोषींना वेगवेगळी फाशी देण्याच्या याचिकेवर न्यायमूर्ती आर. भानुमती, न्यायमूर्ती अशोक भूषण आणि न्यायमूर्ती ए. एस. बोपन्ना यांच्या खंडपीठासमोर सुनावणी झाली. या प्रकरणी कोर्टाने चारही दोषींना आधीच नोटीस जारी केली आहे.

'निर्भया'च्या दोषीची याचिका कोर्टाने फेटाळली

राजस्थानमध्ये बलात्कार पीडितेची आत्महत्या

चारही दोषी एक, एक करून कायदेशीर पर्यायांचा वापर करत आहेत. कायद्याचा त्यांनी खेळ करून ठेवला आहे. ज्यांचे कायदेशीर पर्याय संपले आहेत त्यांना फाशी दिली गेली पाहिजे, अशी मागणी केंद्र सरकारने याचिकेतून केलीय. तर चारही दोषींना एकाचवेळी फासावर लटकवा, असा निर्णय दिल्ली हायकोर्टाने दिला होता. तसंच दोषींना आपल्याकडील पर्यायांचा वापर करण्यासाठी एक आठवड्याची मुदत दिली होती.

निर्भया प्रकरणातील दोषी विनय शर्मा याची याचिका दिल्लीतील पतियाळा हाउस कोर्टाने गेल्या शनिवारी फेटाळली. मानसिक तणावाखाली असल्याने आपल्याला तात्काळ उच्चस्तरीय वैद्यकीय सेवा उपलब्ध करून द्यावी, अशी याचिका दोषी विनय शर्माने केली होती. यापूर्वी तिहार तुरुंग प्रशासनाने विनयचा अहवाल कोर्टात सादर केला होता. कोर्टाने गेल्या गुरूवारी या प्रकरणाच्या सुनावणीवेळी तुरुंग प्रशासनाला विनयचा अहवाल सादर करण्याचे आदेश दिले होते.