निर्भया: दोषींना उद्याच फाशी होणार की नाही?; आज निकाल

नवी दिल्लीः निर्भया सामूहिक बलात्कार प्रकरणातील दोषींना फाशी देण्याची तयारी पूर्ण झाल्याची माहिती तिहार कारागृहाच्या प्रशासनाने दिल्ली न्यायालयात दिली. तिहार कारागृह प्रशासनाच्यावतीने इरफान अहमद पातियाळा हाऊस न्यायालयासमोर हजर झाले. पातियाळा हाऊस न्यायालयात फाशी पुढे ढकलण्यासंदर्भात याचिका दाखल करण्यात आली असून, त्यावर सुनावणी सुरू आहे. निर्भया प्रकरणातील दोषींना उद्या, १ फेब्रुवारी रोजी फाशी द्यायची की नाही, यावर न्यायालय निर्णय देणार आहे.

इरफान यांनी न्यायालयाला सांगितले की, निर्भया प्रकरणातील दोषींपैकी विनय शर्मा यांची याचिका प्रलंबित आहे. अन्य कोणतेही प्रकरण न्यायप्रविष्ट नाही. त्यामुळे उर्वरित तीन जणांना फाशी दिली जाऊ शकते. दोषींना फाशी देण्याची तयारी पूर्ण झाली आहे. यात कोणतीही बाब बेकायदा नाही, असे त्यांनी यावेळी नमूद केले.

याचिकेवर सुनावणी सुरू असताना दोन्ही पक्षांच्या वकिलांमध्ये शाब्दिक चकमक उडाली. या प्रकारावर न्यायालयाने तीव्र नाराजी व्यक्त केली. निर्भया प्रकरणातील दोषी मुकेश सिंह यांच्या वकील वृंदा ग्रोवर न्यायालयात उपस्थित राहिल्याबद्दल वकिलांनी आक्षेप घेतला. यावरून वकिलांमध्ये वाद झाला.

'शर्जीलला भर चौकात गोळ्या घातल्या पाहिजेत'

निर्भया प्रकरणातील दोषी पवन गुप्ता यांनी सर्वोच्च न्यायालयाच्या निर्णयाविरोधात पुनर्विचार याचिका दाखल केली होती. घटना घडली तेव्हा अल्पवयीन असल्याचा दावा त्याने या याचिकेत केला आहे. न्यायालयाने पवन गुप्ताची याचिका फेटाळून लावली होती.

करोना: WHO कडून जागतिक आणीबाणी घोषित

दरम्यान, निर्भयाच्या चारही दोषींविरोधात डेथ वॉरंट जारी झाले असून, त्यांना १ फेब्रुवारी रोजी पहाटे ६ वाजता फाशी दिली जाणार आहे. या चारही आरोपींना २२ जानेवारी रोजी फाशी देण्यात येणार होती. तसे डेथ वॉरंटही बजावण्यात आले होते. मात्र, त्यानंतर दोषींपैकी मुकेश सिंह याने दयेचा अर्ज दाखल केला. तो राष्ट्रपतींनी फेटाळल्यानंतर अन्य आरोपी पवन कुमार याने घटना घडली, त्यावेळी तो अल्पवयीन असल्याचा दावा करणारी याचिका केली. अखेर सर्व याचिका फेटाळून लावल्यानंतर पुन्हा १ फेब्रुवारी रोजी पहाटे ६ वाजता दोषींना फाशी देण्याचे डेथ वॉरंट जारी करण्यात आले.