निठारी हत्याकांड: कोली आणि पंधेरला फाशी

मटा ऑनलाइन वृत्त । गाजियाबाद

अंगाचा थरकाप उडविणाऱ्या निठारी हत्याकांडाशी संबंधित एका २० वर्षीय तरूणीचं अपहरण करून तिच्यावर बलात्कार केल्याप्रकरणी आरोपी मोनिंदर सिंग पंधेर आणि त्याचा सहाय्यक सुरेंद्र कोली याला फाशीची शिक्षा ठोठावण्यात आली आहे. गाजियाबादच्या विशेष न्यायालयाने आज ही शिक्षा ठोठावली आहे.

पिंकी सरकार या २० वर्षीय तरूणीच्या हत्येशी संबंधित हे प्रकरण आहे. या तरूणीच्या हत्येप्रकरणी २९ डिसेंबर २००६ रोजी गुन्हा दाखल करण्यात आला होता. निठारी प्रकरणातील हा आठवा गुन्हा होता. याप्रकरणी सीबीआयच्या विशेष न्यायालयाचे न्यायाधीश पवन कुमार तिवारी यांनी कोली आणि पंढेर यांना दोषी ठरवले होते. त्यानंतर या दोघांना लगेचच ताब्यात घेण्यात आले होते. त्यावर आज निर्णय देताना दोघांना फाशी ठोठावण्यात आली.

५ ऑक्टोबर २००६ रोजी पीडित तरूणी तिच्या कार्यालयातून घरी जात होती. पंधेरच्या घराजवळूनच जात असताना कोलीने तिची हत्या केली. तिचे मुंडके उडवून धडापासून वेगळे केले आणि मुंडके घराच्या पाठीमागे फेकून दिले होते. हे प्रकरण बाहेर आल्यानंतर पोलिसांनी तपास केल्यावर पंधेरच्या घरामागे १६ खोपड्या आढळून आल्या होत्या. या दोघांनी लहान मुलींच्या सर्वाधिक हत्या केल्याचंही आढळून आलं होतं.