पंतप्रधानपदाच्या शर्यतीत नाही: नितीश

मटा ऑनलाइन वृत्त । पाटणा

राष्ट्रीय पातळीवर महाआघाडीची मोट बांधून नितीश कुमार यांना पंतप्रधानपदाचे उमेदवार बनवण्याच्या हालचाली सुरू असताना खुद्द नितीश यांनी मात्र आपण पंतप्रधानपदाच्या शर्यतीत नसल्याचे आज स्पष्ट केले. विशेष म्हणजे नितीश यांनी पंतप्रधान नरेंद्र मोदी यांच्या नेतृत्वाची यावेळी मुक्तकंठाने प्रशंसा केली.

पाटणा येथे आयोजित लोकसंवाद कार्यक्रमात नितीश यांनी पत्रकारांच्या प्रश्नांना मनमोकळेपणाने उत्तरे दिली. त्यांना पंतप्रधानपदाच्या उमेदवारीबद्दल विचारले असता माझ्या कुवतीबाहेरची स्वप्ने पाहण्याचा मुर्खपणा मी करणार नाही. पंतप्रधान होण्याची क्षमता माझ्यात नाही. मी एका छोट्या पक्षाचा नेता आहे. मला कोणत्याही राष्ट्रीय नेतृत्वाची महत्त्वाकांक्षा नाही. बिहारच्या लोकांची सेवा करण्यासाठी मला आणि माझ्या पक्षाला कौल मिळाला आहे आणि ते काम मी निष्ठेने करणार आहे, असे नितीश म्हणाले.

नितीश यांनी नरेंद्र मोदी यांच्या नेतृत्वाची प्रशंसा केली. 'मोदी पंतप्रधान होतील असं पाच वर्षांपूर्वी कुणालाही वाटलं नव्हतं पण मोदी पंतप्रधान झाले. लोकांनी त्यांच्यामध्ये क्षमता पाहिली आणि त्यांना पंतप्रधान बनवलं', असे नितीश म्हणाले. ज्या व्यक्तीमधील क्षमता लोक ओळखतील ती व्यक्तीच देशाच्या पंतप्रधानपदी विराजमान होईल, असे सूचक विधानही नितीश यांनी पुढे केले.

राष्ट्रपतीपदाचा उमेदवार एकमताने निश्चित करायला हवा. ती आपली पंरपराही आहे. मात्र तसे झाले नाही तर विरोधी पक्षांना आपला उमेदवार द्यावा लागेल, असे नितीश म्हणाले. प्रणव मुखर्जी यांना राष्ट्रपतीपदासाठी पुन्हा पसंती दिली जायला हवी का, असे विचारले असता तसं झालं तर चांगलंच आहे पण त्याचा निर्णय केंद्र सरकारने घ्यायचा आहे, असे नितीश म्हणाले.

भाजपने लालू प्रसाद यादव यांच्या कुटुंबावर केलेल्या भ्रष्टाचाराच्या आरोपावर प्रतिक्रिया देण्यास नितीश यांनी नकार दिला. जर बेहिशेबी संपत्तीबाबत पुरावे असतील तर त्यांनी कायद्याचा आधार घ्यायला हवा, असा सल्लाही नितीश यांनी भाजपला दिला.