गर्भावस्थेत मांस, सेक्स वर्ज्य करा; केंद्राचा सल्ला!

मटा ऑनलाइन वृत्त । नवी दिल्ली

गर्भावस्थेत मांस खाऊ नका, शारीरिक संबंध ठेवू नका, वाईट संगतीपासून दूर राहा, आध्यात्मिक विचार करा... गर्भवतींना हा सल्ला दिला आहे मोदी सरकारच्या नेतृत्वाखालील केंद्र सरकारच्या आयुष मंत्रालयाने! आयुष मंत्रालयाच्या एका पुस्तिकेत हे उपदेशाचे डोस पाजण्यात आले आहेत.

डॉक्टरांच्या म्हणण्यानुसार, गर्भावस्थेत मांस खाण्यास हरकत नसते. यामुळे प्रथिने, लोह मिळते. गर्भाशयाला काही त्रास नसेल तर शारीरिक संबंध ठेवण्यातही गैर काही नसल्याचे डॉक्टर सांगतात. पण आयुष मंत्रालयाचे सल्ले औरच आहेत.

सेंट्रल काऊन्सिल फॉर रिसर्च इन योग अँड नेचरोपथीच्या 'मदर अँड चाईल्ड केअर' नावाची पुस्तिका अलिकडेच आयुष मंत्री श्रीपाद नाईक यांनी प्रकाशित केली होती. काऊन्सिलचे संचालक डॉ. ईश्वर आचार्य यांनी सांगितले की, 'या पुस्तिकेत गर्भवती महिलांना योग, आहार आणि दैनंदिन दिनचर्येविषयी सल्ले देण्यात आले आहेत. हे सल्ले निरुपद्रवी आहेत. ज्यांना आवडले ते अंमलात आणू शकतात.'

या पुस्तिकेत असंही म्हटलं आहे की गर्भावस्थेदरम्यान आध्यात्मिक वाचन करायला हवे. मन शांत ठेवायला हवे आणि महापुरुषांची चरित्रे वाचायला हवी. गर्भावस्थेत करावयाच्या योगासने तसेच प्राणायामविषयीदेखील पुस्तिकेत माहिती देण्यात आली आहे.