ताजमहालात बाहेरच्यांना नमाजाची परवानगी नाही; SC

नवी दिल्ली :

ताजमहालात कोणत्याही बाहेरच्या मुस्लिमांना नमाज अदा करता येणार नाही, असं आज सर्वोच्च न्यायालयानं स्पष्ट केलं. ताजमहाल जगातल्या सात आश्चर्यांपैकी एक असल्याने त्याचं संवर्धन आणि सुरक्षिततेच्या दृष्टीने हा निर्णय दिल्याचंही न्यायालयानं सांगितलं.

ताजमहालच्या सुरक्षिततेच्या दृष्टीने २४ जानेवारी रोजी जिल्हा प्रशासनानं एक आदेश काढला. केवळ स्थानिकांनाच शुक्रवारचा नमाज अदा करता येईल. त्यासाठी त्यांना योग्य ओळखपत्रासह तपासणी करून सोडण्यात येईल. अन्य पर्यटकांसाठी शुक्रवारी ताजमहाल बंद ठेवण्यात येईल, असे या आदेशात म्हटले होते. या आदेशाविरोधात सर्वोच्च न्यायालयात याचिका दाखल करण्यात आली होती.

सर्वोच्च न्यायालयाच्या आदेशानंतर आता यापुढे केवळ आग्र्यातील रहिवाशांनाच ताजमहालाच्या आवारात शुक्रवारचा नमाज अदा करता येणार आहे, असे आग्र्याचे जिल्हाधिकारी गौरव दयाळ यांनी सांगितले.

यापूर्वी २०१३ मध्ये भारतीय पुरातत्व विभागानेदेखील अशाच प्रकारचे आदेश दिले होते. मात्र त्या आदेशाची योग्य अंमलबजावणी झाली नव्हती, असे एका अधिकाऱ्याने सांगितले.