‘तिहेरी तलाकचा राजकीय वापर नको’

नवी दिल्ली : ‘तिहेरी तलाकच्या मुद्द्याचा राजकीय वापर होऊ देऊ नका,’ असे आवाहन पंतप्रधान नरेंद्र मोदी यांनी मुस्लिम धर्मियांच्या नेत्यांना मंगळवारी केले. मुस्लिम धर्मात आवश्यक सुधारणा घडवून आणण्यासाठी पुढाकार घ्या, असे आवाहनही मोदी यांनी या नेत्यांना केले. जमात उलेमा-ए-हिंद या संघटनेच्या नेत्यांना मोदी यांनी चर्चेसाठी आमंत्रित केले होते. त्या दरम्यान त्यांनी हे आवाहन केले.
मोदी म्हणाले, ‘देशांतील विविध गटांत, धर्मीयांत असणारा सुसंवाद व ताळमेळ हीच लोकशाहीची खरी शक्ती आहे. देशातील नागरिकांमध्ये आम्ही भेदभाव करू शकत नाही. विविधतेतील ऐक्य हे आपले वैशिष्ट्य आहे. तिहेरी तलाकासारख्या मुद्द्यावरून राजकारण करण्याची संधी कोणालाही देऊ नका. यानिमित्ताने मुस्लिम धर्मात आवश्यक सुधारणा करण्याची संधी असून ही जबाबदारी तुम्ही घ्या.’ तलाकपद्धतीविरोधात मोदी यांनी जातीयवादी भूमिकेतून मोहीम सुरू केली आहे, असा आरोप मार्क्सवादी कम्युनिस्ट पक्षाचे नेते सीताराम येचुरी यांनी केली होती. त्यांच्या या वक्तव्याचा मोदी यांनी अप्रत्यक्षपणे समाचार घेतला.