बनावट नोटांचे एकही प्रकरण नाही: अर्थमंत्रालय

मटा ऑनलाइन वृत्त । नवी दिल्ली

नोटाबंदीच्या घोषणेदरम्यान पंतप्रधान नरेंद्र मोदी यांनी आणि त्यानंतर केंद्र सरकारनेही वारंवार सांगितले की ही मोहिम बनावट नोटांना आळा घालण्यासाठी आहे. पण आपला हा दावा वित्त मंत्रालयाला खोडून टाकावा लागला आहे. ८ नोव्हेंबर ते ३० डिसेंबर या काळात बनावट नोटा आल्या नसल्याचे नोटाबंदीनंतर दीड महिन्यातच वित्त मंत्रालयाने मान्य केले आहे.

सेंट्रल बोर्ड ऑफ एक्साइज अॅंड कस्टम्स (CBEC) च्या अंतर्गत येणाऱ्या संस्थांकडे सरकारने जुन्या नोटा जमा करण्यासाठी दिलेल्या ५० दिवसांच्या कालावधीत बनावट नोटांचे एकही प्रकरण समोर आले नाही. इंडियन एक्स्प्रेसच्या हवाल्याने ही माहिती मिळाली आहे.

नोटाबंदीच्या निर्णयामुळे बनावट नोटांच्या आधारे चालणाऱ्या दहशतवाद आणि तस्करीसारख्या गुन्ह्यांना आळा बसेल असाही एक दावा सरकारने केला होता. पण आतापर्यंत कोणत्याही दहशतवादी गटाकडून नोटांच्या जप्तीची कोणतीही माहिती सरकारकडे नाही.