'कटप्पा' विरोधात अजामिनपात्र अटक वॉरंट

मटा ऑनलाइन वृत्त । उटी

उटी मॅजिस्ट्रेट कोर्टाने बाहुबली चित्रपटातील कटप्पा अर्थात अभिनेते सत्यराज यांच्यासह आठ तमिळ कलाकारांविरोधात अजामिनपात्र वॉरंट काढले आहे. एका पत्रकाराने दाखल केलेल्या अब्रुनुकसानीच्या खटल्यात कलाकार वारंवार अनुपस्थित राहिल्यामुळे कोर्टाने अजामिनपात्र अटक वॉरंट काढले आहे.

अभिनेते सत्यराज यांच्यासह अभिनेते सुर्या, आर. सरथकुमार आणि अभिनेत्री श्रीप्रिया यांचाही समावेश आहे. एका तामिळ दैनिकांने अभिनेत्रींबाबत मजकूर प्रसिद्ध केला होता. ७ ऑक्टोबर २००९ रोजी, साऊथ इंडिया सिने अॅक्टर्स असोसिएशनने बैठकीत या दैनिकात प्रसिद्ध झालेला मजकूर अभिनेत्रींची प्रतिमा डागाळणारी असल्याची टीका केली होती. बैठकीत कलाकारांनी संबंधित वृत्तपत्रावर टीका करण्याऐवजी त्यांनी सर्वच पत्रकारांवर टीका केली असल्याचे याचिकाकर्ते मुक्त पत्रकार एम. रोझारिओ यांनी सांगितले.

अभिनेता सुर्या, सत्यराज, सरथकुमार, अभिनेत्री श्रीप्रिया, विजयकुमार, अरूण विजय, विवेक आदी कलाकारांनी १९ डिसेंबर २०११ रोजी कोर्टासमोर हजेरी लावली. त्यांनंतर या खटल्याच्या सुनावणीच्यावेळी प्रत्यक्ष उपस्थित राहण्यातून परवानगी मिळावी या कलाकारांनी मद्रास हायकोर्टात याचिका दाखल केली होती. मात्र, हायकोर्टाने ही याचिका फेटाळून लावली होती.