रामदेव बाबांविरुद्ध अजामीनपात्र वॉरंट

मटा ऑनलाइन वृत्त | रोहतक

'भारत माता की जय' या घोषणेला विरोध करणाऱ्यांची मुंडकी छाटावीत असं वक्तव्य करणाऱ्या योगगुरू रामदेव बाबा यांच्याविरोधात हरियाणाच्या कोर्टानं अजामीनपात्र वॉरंट जारी केलं आहे.

रामदेव बाबा यांनी गेल्या वर्षी सद्भावना संमेलनात चिथावणीखोर वक्तव्य केलं होतं. त्याविरोधात हरियाणातील काँग्रेस नेते आणि माजी मंत्री सुभाष बत्रा यांनी तक्रार दाखल केली होती. त्यानंतर हरियाणाचे अतिरिक्त मुख्य न्यायाधीश हरिश गोयल यांनी रामदेव बाबांना समन्स देखील धाडले. १२ मे रोजी झालेल्या सुनावणीत रामदेव बाबांना न्यायाधीशांनी १४ जून रोजी हजर राहण्याचे आदेश दिले होते. मात्र, रामदेव बाबा काल झालेल्या सुनावणीवेळी गैरहजर राहिले. त्यामुळे न्यायालयाने त्यांच्याविरोधात अजामीनपात्र वॉरंट जारी केलयं. पुढील सुनावणी ३ ऑगस्ट रोजी होणार आहे.

सद्भावना संमेलनात बोलताना रामदेव बाबा यांनी 'कायद्यामुळे हात बांधले आहेत. अन्यथा भारत माता की जय म्हणण्यास नकार देणाऱ्या लाखोंची मुंडकी छाटली असती,’ असं वादग्रस्त वक्तव्य केलं होतं. रामदेव बाबा हरयाणा सरकारचे योग आणि आयुर्वेदाचे ब्रँड ऍम्बेसेडर आहेत. जाट आंदोलनाला संबोधित करताना लाखोंच्या समुदायासमोर रामदेव बाबांनी हे विधान केलं होतं.