डॉमिनोजची गुजरातमध्ये नॉन व्हेज पिझ्झा विक्री बंद

अहमदाबाद:

डॉमिनेजने गुजरातमध्ये नॉन व्हेज पिझ्झाची विक्री बंद केली आहे. त्यामुळे आता गुजरातेत डॉमिनोजच्या आउटलेटमध्ये बॉर्बेक्यू चिकन, चिकन टिक्का, पेरी-पेरी चिकन, चिकन पेपरॉनी मिळणार नाही. डॉमिनेजच्या आउटलेटमधून अचानक नॉन व्हेज पिझ्झा मिळणं बंद झाल्यानं आश्चर्य व्यक्त केलं जात आहे.

एका वृत्तवाहिनीने याबाबतचं वृत्त दिलं आहे. गेल्या काही दिवसांपासून गुजरातमध्ये डॉमिनेजच्या आउटलेटमधील मेन्यू कार्डातून नॉन व्हेज पदार्थ हटवण्यात आले आहेत. आता हे पदार्थ पुन्हा आउटलेटमध्ये ठेवली जातील असं वाटत नाही, असं या वृत्तवाहिनीने म्हटलं आहे. संपूर्ण गुजरातमध्ये डॉमिनेजच्या कोणत्याही आउटलेटमध्ये नॉन व्हेज पदार्थ मिळणार नाहीत, असं डॉमिनोज आउटलेटमधील एका मॅनेजरने सांगत या वृत्ताला दुजोरा दिला.

डॉमिनोजच्या ऑनलाइन ऑर्डर सर्व्हिसमधूनही हेच उत्तर मिळत होतं. अहमदाबाद, बडोदा, सुरत आणि आणंदमध्येही हेच उत्तर मिळंत होतं. सर्व आउटलेटमधून केवळ पिझ्झा मिळत होता. पण कुणाकडेही नॉन व्हेज पिझ्झा मिळत नव्हता. मात्र गुजरातच्या बाजुलाच असलेल्या दमनमध्ये डॉमिनोजच्या आउटलेटमध्ये सर्व प्रकारचा नॉन व्हेज पिझ्झा मिळत असल्याचंही या वृत्तवाहिनीने दिलेल्या बातमीत म्हटलं आहे.