'...तर पाकिस्तानवर पुन्हा सर्जिकल स्ट्राइक'

मटा ऑनलाइन वृत्त । उधमपूर, जम्मू-काश्मीर

दहशतवाद्यांची घुसखोरी आणि शस्त्रसंधींचे सतत उल्लंघन यामुळे भारतीय लष्कराच्या वरिष्ठ अधिकाऱ्याने पाकला ठणकावले आहे. पाकिस्तानने कुरघोड्या थांबवल्या नाहीत तर पुन्हा सर्जिकल स्ट्राइक केले जाईल, असा इशारा लष्कराच्या उत्तर कमांडचे लेफ्टनंट जनरल देवराज अन्बू यांनी दिला आहे.

सीमेपलिकडे जावून सर्जिकल स्ट्राइक करू शकतो हे आम्ही दाखवून दिले आहे. यामुळे सीमा रेषाचे कुठलेही बंधन आम्हाला राहिलेले नाही. आता आम्ही कधीही सीमेपलिकडे कारवाई करू शकतो, असं एका पत्रकार परिषदेत देवराज यांनी सांगितलं. दहशतवादाला पैसा पुरवल्याचा काश्मीरमधील फुटीरतावाद्यांचा संबंध उघड झाल्याने दगडफेकीच्या घटना कमी झाल्या आहेत, असं ते म्हणाले.

सीमेपलिकडे दहशतवाद्यांचे तळ वाढले आहेत. पीर पंजालच्या दक्षिण आणि उत्तर भागात मोठ्या प्रमाणात दहशतवाद्यांचे तळ आहेत. सर्जिकल स्ट्राइकनंतरही त्यांची संख्या कमी झालेली नाही, अशी माहिती देवराज यांनी दिली.