पंतप्रधान मोदींचा चीनला अप्रत्यक्ष टोला

मटा ऑनलाइन वृत्त । नवी दिल्ली

'दोन सामर्थ्यशाली शेजाऱ्यांमध्ये मतभेद असणं हे स्वाभाविक आहे. त्यात आश्चर्य वाटण्यासारखं काहीच नाही,' असं सांगत, पंतप्रधान नरेंद्र मोदी यांनी आज भारत हा चीनच्या बरोबरीचा असल्याचं जाहीररित्या सांगून टाकलं. तसंच, 'सबका साथ, सबका विकास' हे केवळ भारतापुरतं मर्यादित नाही. हा विचार संपूर्ण जगाला लागू आहे,' असंही ते म्हणाले.

'रायसिना डायलॉग' या कार्यक्रमात ते बोलत होते. जगातील ६५ देशांचे २५० प्रतिनिधी या कार्यक्रमात सहभागी झाले होते. भारताच्या परराष्ट्र धोरणाची दिशा स्पष्ट करताना पंतप्रधानांनी यावेळी पुन्हा एकदा पाकिस्तानला लक्ष्य केलं. 'पाकिस्तानशी चर्चा करण्याबाबत आम्ही सकारात्मक आहोत. मात्र, त्यांनी दहशतवादापासून फारकत घेणं ही त्यासाठीची अट आहे. भारत एकटा शांततेच्या मार्गावर चालू शकत नाही. पाकनंही तोच मार्ग धरायला हवा,' असं मोदींनी सांगितलं. 'जगाशी संबंध न ठेवता भारत स्वत:ची प्रगती करू शकत नाही. समृद्ध आणि परस्परांशी उत्तम संवाद ठेवून असलेले शेजारी हे आमचं स्वप्न आहे. २०१४ साली सत्तेवर आल्यापासून हे स्वप्न प्रत्यक्षात उतरवण्यासाठी आम्ही प्रयत्नशील आहोत,' असंही मोदी म्हणाले.