राम जेठमलानी यांची वकिली व्यवसायातून निवृत्ती

मटा ऑनलाइन वृत्त । नवी दिल्ली

ज्येष्ठ वकील, कायदेतज्ञ राम जेठमलानी यांनी वकिली व्यवसायातून निवृत्ती घेण्याची घोषणा केली आहे. देशातील सर्वात नामंकित वकिलांमध्ये राम जेठमलानी गणना होते. निवृत्तीनंतर भ्रष्टाचाराविरोधातील आपली लढाई सुरू ठेवणार असल्याचे जेठमलानी यांनी सांगितले.

सुप्रीम कोर्टाचे सरन्यायाधीश दीपक मिश्रा यांच्या सन्मानार्थ एका कार्यक्रमाचे आयोजन करण्यात आले होते. या कार्यक्रमात बोलताना राम जेठमलानी यांनी आपल्या निवृत्तीची घोषणा केली. यावेळी जेठमलानी यांनी सध्याच्या केंद्र सरकारवर व युपीए सरकारवरही टीका केली. दोन्ही सरकारांनी देशातील परिस्थिती चिंताजनक केले असल्याचे म्हटले. या वाईट परिस्थीतीतून देशाला बाहेर काढण्याची जबाबदारी ही बार कौंसिल सदस्यांसह देशातील नागरिकांची असल्याचे जेठमलानी यांनी नमूद केले. आपल्या वकिली व्यवसायातून निवृत्तीची घोषणा करण्यासाठी या ठिकाणी उपस्थित राहिलो असून भ्रष्ट राजकीय नेत्यांविरोधात लढा सुरू ठेवणार असल्याचे जेठमलानी यांनी म्हटले.

दरम्यान, राम जेठमलानी यांनी काही वर्षांपूर्वीच आपल्या शहराबाहेरील प्रकरणांसाठी वकीलपत्र स्वीकारणे बंद केले आहे. मागील सात दशकांहून अधिक काळ राम जेठमलानी वकिली व्यवसायात असून अनेक गाजलेल्या खटल्यांमध्ये त्यांनी वकीलपत्र स्वीकारले होते.