CRPFच्या जवानाचाही भेदभावाचा आरोप

मटा ऑनलाइन वृत्त । चंदीगड

सीमा सुरक्षा दलाच्या (बीएसएफ) जवानांना निकृष्ट दर्जाचं अन्न पुरवलं जात असल्याचं एका जवानानं व्हिडिओतून निदर्शनास आणल्यामुळं खळबळ उडाली असतानाच आता केंद्रीय राखीव पोलीस दलाच्या (सीआरपीएफ) जवानाचाही एक व्हिडिओ व्हायरल झाला आहे. सोयीसुविधांच्या बाबतीत सीआरपीएफ आणि लष्कराच्या जवानांमध्ये भेदभाव होत असल्याचा गंभीर आरोप त्यानं केला आहे.

जीत सिंग असं या जवानाचं नाव असून तो मूळचा मथुरेचा आहे. २०१२साली सीआरपीएफमध्ये दाखल झालेला जीत सध्या माऊंट अबू येथे तैनात आहे. स्वत:च्या आवाजातील एक व्हिडिओ सोशल मीडियावर टाकून त्यानं आपल्या संतप्त भावना मांडल्या आहेत. 'सीआरपीएफचे सर्व जवान स्वत:ची कर्तव्ये प्रामाणिकपणे बजावतात. ग्रामपंचायतीच्या निवडणुकांपासून ते व्हीआयपी, संसद सभागृह, मंदिरं, मशिदी, विमानतळं अशा सर्वच ठिकाणी आदेशाबरहुकूम सेवा पुरवतात. मात्र, लष्करी जवानांच्या तुलनेत आम्हाला दुय्यम वागणूक दिली जाते. आम्हाला लष्कराप्रमाणे सुविधा दिल्या जात नाहीत,' असं त्यानं म्हटलं आहे.

व्हिडिओच्या माध्यमातून त्यानं काही गोष्टी पंतप्रधान मोदींच्या निदर्शनास आणून दिल्या आहेत. 'सरकारी महाविद्यालयातील शिक्षकांना ५० ते ६० हजार रुपये पगार मिळतो. सणासुदीच्या सुट्ट्या मिळतात. मात्र, छत्तीसगड, झारखंडसारख्या राज्यांतील घनदाट जंगलांमध्ये कर्तव्य बजावणाऱ्या सीआरपीएफला साध्या सुविधाही मिळत नाहीत. लष्कराच्या जवानांना निवृत्तीवेतन मिळते. मात्र, २०-२० वर्षे सेवा बजावणाऱ्या निमलष्करी दलातील जवानांना तो अधिकार अद्याप मिळालेला नाही. माजी सैनिक म्हणून आम्हाला कसलंही आरक्षण नाही. वैद्यकीय सुविधा मिळत नाहीत. ज्या सुविधा मिळतात, त्याही लष्करी जवानांच्या तुलनेत अत्यंत सुमार दर्जाच्या असतात. हा सरळसरळ भेदभाव आहे,' असं त्यानं म्हटलं आहे. जीतच्या या व्हिडिओनंतर सरकार काय भूमिका घेते, हे पाहणं महत्त्वाचं ठरणार आहे.