आता मी कोणत्याच पक्षाचा नाही: व्यंकया नायडू

मटा ऑनलाइन वृत्त । नवी दिल्ली

आईच्या मृत्यूनंतर मी भाजपलाच आई समजत आलोय. भाजप मला आईसारखा आहे. आता पक्षापासून दुरावताना मला वेदना होत आहेत. उपराष्ट्रपतिपदाचा अर्ज भरल्यानंतर आता मी कोणत्याच पक्षाचा राहिलो नाही, असे उदगार राष्ट्रीय लोकशाही आघाडीचे उपराष्ट्रपतिपदाचे उमेदवार व्यंकया नायडू यांनी काढले.

उमेदवारी अर्ज भरल्यानंतर घेतलेल्या पत्रकार परिषदेत ते बोलत होते. आजपासून माझी भूमिका वेगळी असेल. उपराष्ट्रपतिपदाची उमेदवारी मिळणे हा माझा सन्मानच आहे. आतापर्यंत सार्वजनिक जीवनात सतत लोकांमध्ये राहिलो. लोकांसोबत काम केलं. आता उपराष्ट्रपति म्हणून वेगळी जबाबदारी पार पाडावी लागणार आहे, असं व्यंकया नायडू म्हणाले.

उपराष्ट्रपतिपद आणि राज्यसभेची प्रतिष्ठा कायम राखण्याचा प्रयत्न करेन. उपराष्ट्रपतिपदाला न्याय देण्याचा माझा प्रयत्न असेल, असं सांगतानाच मी सामान्य व्यक्ति आहे. सर्वसाधारण कुटुंबातून आलो आहे. केवळ भाजपामुळेच मी इथवर येऊ शकलो, अशी भावनाही त्यांनी व्यक्त केली. उपराष्ट्रपतिपदाचा उमेदवार म्हणून पाठिंबा देणाऱ्या सर्व घटक पक्षांचेही त्यांनी आभार मानले.