समाजवादी पक्षाच्या सायकलवर काँग्रेस स्वार

मटा ऑनलाइन वृत्त । लखनऊ

उत्तर प्रदेश विधानसभा निवडणुकीसाठी अखेर काँग्रेस आणि समाजवादी पक्षात आघाडी झाली आहे. उत्तर प्रदेशमधील ४०३ जागांपैकी समाजवादी पक्ष २९८ जागा तर, काँग्रेस १०५ जागांवर निवडणूक लढवणार आहेत.

समाजवादी पक्षाचे प्रदेश अध्यक्ष नरेश उत्तम आणि काँग्रेसचे प्रदेश अध्यक्ष राज बब्बर यांनी पत्रकार परिषदेत आघाडीची घोषणा केली. सपा आणि काँग्रेसमधील आघाडी ही नव्या राजकारणाची सुरुवात असल्याचे नरेश उत्तम यांनी सांगितले. धर्मांध शक्तिंना रोखण्यासाठी ही आघाडी सर्वतोपरी प्रयत्न करणार असल्याचे त्यांनी स्पष्ट केले.

मागील काही दिवसांपासून सपा आणि काँग्रेस यांच्यात जागा वाटपावरुन तणाव निर्माण झाला होता. त्यातच अखिलेश यादव यांनी समाजवादी पक्षाच्या उमेदवारांची यादी जाहीर केल्यामुळे आघाडीत बिघाडी होणार असल्याच्या शक्यता वर्तवण्यात येत होत्या. सपा आणि काँग्रेसमध्ये आघाडी व्हावी यासाठी काँग्रेस अध्यक्षा सोनिया गांधी आणि प्रियंका गांधींनी प्रयत्न केले असल्याची माहिती सूत्रांनी दिली.