आता हॅकर्सच्या रडारवर संसदेची वेबसाईट

मटा ऑनलाइन वृत्त । नवी दिल्ली

काँग्रेसचे उपाध्यक्ष राहूल गांधी, उद्योगपती विजय मल्ल्या आणि पत्रकारांचे टि्वटर अकाऊंट हॅक केल्यानंतर आता 'लेजिन' हॅकर हा ग्रुप भारतीय संसदेची वेबसाईट हॅक करणार आहे. 'आमच्या निशाण्यावर भारतीय संसदेची sansad.nic.in ही वेबसाईट आहे. त्यात अनेक बडे मासे असल्याने आम्हांला ही साइट हॅक करायचीय,' असा इशारा लेजिनच्या एका सदस्याने दिला आहे.

लेजिनच्या एका सदस्याने वॉशिंग्टन पोस्ट आणि फॅक्टरडेली डॉट कॉमला दिलेल्या मुलाखतीत हा इशारा दिलाय. संसदेची ही वेबसाइट सरकारी असून सरकारी कर्मचाऱ्यांना ईमेल सर्व्हिस पुरविते. या हॅकर्सनी चेन्नईच्या अपोलो हॉस्पिटलपर्यंत मजल मारली आहे. मात्र अपोलोच्या सर्व्हरमधून मिळवलेली आकडेवारी सांगण्यास त्याने नकार दिलाय. ही आकडेवारी जाहीर केल्यास भारतात गोंधळ उडेल असा दावा त्याने केला आहे. अण्णा द्रमुकचया सर्वेसर्वा जयललिता यांनी अखेरचा श्वास घेतलेल्या या अपोलो हॉस्पिटलमधील चेनबाबत सर्वकाही माहिती असल्याचेही या हॅकर्सचे म्हणणे आहे.

बँकांचे सर्व्हेर कधीही हॅक होणार

भारतीय बँकींग सिस्टिम सुद्धा सायबर हल्ल्याच्या निशाण्यावर असल्याचा गौप्यस्फोट त्याने केलाय. त्यामुळे भारतीय बँकांचे सर्व्हर कधीही हॅक होऊन बँकींग सेवा कोलमडण्याचा धोका निर्माण झाला आहे. यावेळी त्याने बेसिक डाटा सेक्युरिटीजवरही भाष्य केले.

४० हजार सर्व्हर हॅक

लेजिनने आतापर्यंत भारतातील ४० हजाराहुन अधिक सर्व्हर हॅक केले असल्याचे वॉशिंग्टन पोस्टचे पत्रकार मॅक्स बिराक यांनी सांगितलं. ही तर केवळ सुरुवात आहे, आगामी काळात आणखी आकडेवारी समोर येणार असल्याचा लेजिननं दावा केल्याचं बिराक यांनी सांगितलं.

लेजिन काय आहे?

१. लेजिन ऑफ ड्यूम या हॅकर ग्रुपची स्थापना लेक्स लुथर यांनी १९९० मध्ये केली होती. २००० पर्यंत हा ग्रुप सक्रीय होता.

२. इतिहासातील सर्वात प्रभावशाली ग्रुप म्हणून लेजिनकडे पाहिलं जातं.

३. लेजिनचा लेजिन ऑफ ड्यूमशी काही संबंध आहे की नाही हे अजून निश्चित झालेलं नाही.

४. या ग्रुपमुळे जगातील अनेक देशांची डोकेदुखी वाढली आहे.