गोव्यात आज मध्यरात्रीपासून टोल बंद

मटा ऑनलाइन वृत्त । पणजी

देशभरात आज मध्यरात्रीपासून वस्तू सेवा कर (जीएसटी) लागू होणार असल्याने गोव्यातही टोल रद्द केला जाणार आहे. जीएसटी लागू होताच गोव्यात वाहनांसाठी आकारले जाणारे प्रवेश शुल्क रद्द केले जाणार असल्याची माहिती सार्वजनिक बांधकाम मंत्री सुदिन ढवळीकर यांनी दिली आहे.

जीएसटीच्या माध्यमातून देशात नवी कररचना लागू होणार आहे. जीएसटीचा प्रत्येकाच्या आयुष्यावर परिणाम होणार आहे. व्यापारी, ग्राहक, किंमती आणि सरकारी महसूल सर्वांवरच याचा परिणाम होणार आहे. जीएसटी झाल्यानंतर व्हॅटसह इतर सर्व कर रद्द होणार आहे. सध्या देशात केंद्र आणि राज्य सरकारांचे २० हून अधिक विविध कर करदात्याला भरावे लागतात. जीएसटी लागू झाल्यावर या सगळ्या करांची जागा फक्त एकच कर घेणार आहे तो म्हणजे ‘जीएसटी’. या करप्रणालीमुळे सेंट्रल सेल्स टॅक्स, सेवा कर, एक्साइज टॅक्स, लक्झरी टॅक्स, मनोरंजन कर, व्हॅटसारखे सर्व कर रद्द होणार आहेत. ही करप्रणाली लागू झाल्यानंतर केंद्र आणि राज्यसरकारला यातील समान वाटा मिळणार आहे. ‘वन नेशन वन टॅक्स’ या संकल्पनेवर जीएसटी आधारित आहे. जीएसटी लागू होणार असल्याने गोवा सरकारनेही आजपासून टोलनाके बंद करण्याचा निर्णय घेतला आहे. त्यामुळे आता गोव्यात जाणाऱ्या कोणत्याही वाहनांना टोल भरण्याची गरज पडणार नाही.