आता 'या' पक्षासाठी रणनीती आखणार PK

मटा ऑनलाइन वृत्त | नवी दिल्ली

उत्तर प्रदेशात काँग्रेसला सपाटून मार खावा लागल्यानंतर प्रशांत किशोर आता तमिळनाडूत आपल्या 'पॉलिटिकल स्ट्रॅटेजी'चं नशीब आजमावून पाहाणार आहेत.
तमिळनाडूतील डीएमके पक्षाची रणनीती आखण्याचं काम प्रशांत किशोर यांना देण्यात येणार असल्याची माहिती सुत्रांनी दिली आहे. याबाबत इंडियन पॉलिटिकल अॅक्शन कमेटीशी प्रशांत किशोर यांची बोलणी सुरू आहे. पण अंतिम निर्णय अद्याप घेण्यात आलेला नाही.

पॉलिटिकल कमेटीने तमिळनाडूच्या पॉलिटिकल मॅनेजरपदासाठी युवांना संधी देण्यात येणार असल्याचं सांगत अर्ज मागवले होते. राज्यातील निवडणूक प्रचाराचे नियोजन करण्याची जबाबदारी मतदारसंघ व्यवस्थापकाकडे असणार आहे. तर मीडिया मॅनेजरवर पक्षाच्या प्रचारासाठी मीडिया फिडबॅकचा आराखडा विकसीत करण्याचं काम देण्यात येणार आहे. पॉलिटिकन कमिटीने याआधी अशाच प्रकारे आंध्रप्रदेशातही अर्ज मागवले होते.

तमिळनाडूत थेट २०२१ साली विधानसभा निवडणूक होणार आहे. मात्र जयललिता यांच्या मृत्यूनंतर राज्यातील राजकीय परिस्थिती अस्थिर झाली आहे. याच पार्श्वभूमीवर प्रशांत किशोर यांच्या मार्गदर्शनाने डीएमकेला नवी उभारी देण्याचा प्रयत्न करण्यासाठीच्या हालचाली सुरु असल्याची माहिती समोर आली आहे.