गडकरी, अहिर, धोत्रे, तडस ,नेते रिंगणात
वृत्तसंस्था, नवी दिल्ली
लोकसभा निवडणुकीसाठीची भाजपची बहुप्रतीक्षित पहिली उमेदवार यादी गुरुवारी जाहीर करण्यात आली. २१ राज्ये व केंद्रशासित प्रदेशांतील १८४ उमेदवार भाजपने निश्चित केले आहेत. पंतप्रधान नरेंद्र मोदी हे उत्तर प्रदेशातील वाराणसी मतदारसंघातून निवडणूक लढवणार असून, भाजप अध्यक्ष अमित शहा गुजरातच्या गांधीनगरमधून लढणार आहेत. केंद्रीय मंत्री नितीन गडकरी नागपुरातून तर, राजनाथ सिंह लखनऊमधून पुन्हा रिंगणात उतरणार आहेत. स्मृती इराणी याही गेल्या निवडणुकीप्रमाणेच उत्तर प्रदेशातील अमेठी मतदारसंघात काँग्रेस अध्यक्ष राहुल गांधी यांच्यासमोर उभ्या ठाकणार आहेत. पहिल्या यादीत भाजपने बहुसंख्य मतदारसंघांतील जुन्या चेहऱ्यांनाच पुन्हा संधी दिली आहे. गडकरींसह विदर्भातून हंसराज अहिर (चंद्रपूर), रामदास तडस (वर्धा), संजय धोत्रे ( अकोला), अशोक नेते (गडचिरोली) यांच्या नावाची घोषणा करण्यात आली. भंडारा-गोंदियाबाबत मात्र संस्पेन्स कायम आहे.
--हेमा मालिनी मथुरेतून लढणार
उत्तर प्रदेश व पश्चिम बंगालमधून सर्वाधिक (प्रत्येकी २८) उमेदवार निश्चित झाले असून, त्यापाठोपाठ कर्नाटक (२१), महाराष्ट्र व राजस्थान (प्रत्येकी १६), केरळ (१३), ओडिशा (१०) अशा उमेदवारांचा समावेश आहे. गुजरातमधून केवळ शहा यांच्याच नावाची घोषणा झाली आहे. बिहारमधील सर्व १७ उमेदवारांची नावे निश्चित झाली असून, त्यांची घोषणा नंतर करण्यात येईल, असे भाजप नेते जे. पी. नड्डा यांनी जाहीर केले. इतर महत्त्वपूर्ण उमेदवारांमध्ये सध्याचे खासदार व्ही. के. सिंग (गाझियाबाद), हेमा मालिनी (मथुरा), साक्षी महाराज (उन्नाव) येथून पुन्हा रिंगणात असतील. वसुंधराराजे शिंदे यांचा मात्र लोकसभा निवडणूक न लढवण्याचा निर्णय पक्षाने मान्य केला असून, त्यांच्याऐवजी त्यांचे पुत्र दुष्यंत यांना चौथ्यांदा संधी दिली आहे. केंद्रीय मंत्री राज्यवर्धन राठोड यांना जयपूर ग्रामीण येथून तर, सी. पी. जोशी यांना चित्तोडगढ येथून रिंगणार उतरवण्यात आले आहे. केंद्रीय मंत्री किरण रिजिजू पुन्हा अरुणाचल पूर्व येथून, महेश शर्मा नोईडामधून निवडणूक लढवतील. पश्चिम बंगालचे भाजप प्रदेशाध्यक्ष मिदनापूर येथून तर, केंद्रीय मंत्री बाबुल सुप्रियो यांना आसनसोल येथून निवडणूक लढवणार आहेत.