पाकव्याप्त काश्मीर भारताच्या बापाचे आहे का?

मटा ऑनलाइन वृत्त । श्रीनगर

जम्मू-काश्मीरचे माजी मुख्यमंत्री आणि नॅशनल कॉन्फरन्सचे अध्यक्ष फारूख अब्दुल्ला यांनी पाकव्याप्त काश्मीरवर वादग्रस्त वक्तव्य केलं आहे. 'पाकव्याप्त काश्मीर काय भारताच्या बापाचे नाही. जे तो मिळवू पाहतोय', असं वक्तव्य अब्दुल्लांनी केलंय. केंद्रातील मोदी सरकारने पाकिस्तानच्या ताब्यातून पाकव्याप्त काश्मीर मिळवून दाखवावे, असं आव्हानही त्यांनी दिले.

चिनाब परिसरात एक कार्यक्रम आयोजित करण्यात आला होता. या कार्यक्रमात फारूख अब्दुल्लांसह त्यांचा मुलगा आणि माजी मुख्यमंत्री उमर अब्दुल्ला हेही उपस्थित होते. 'पीओके काय तुमच्या बापाचं आहे का? पीओके सध्या पाकिस्तानच्या ताब्यात आहे. ही भारताची खासगी मालमत्ता नाही. ज्यावर भारत आपली वडिलोपार्जीत संपत्ती असल्याप्रमाणे दावा करू शकेल', असं वक्तव्य फारूख अब्दुल्ला यांनी केलं. नेटवर्क १८ ने हे वृत्त दिलं.

'काश्मीर मुद्द्यावर पाकिस्तानही एक पक्ष आहे आणि भारत सरकारने हे मान्य केलं आहे. जम्मू-काश्मीरच्या नागरिकांच्या सामस्या सोडवण्यासाठी भारत सरकार समोर पाकिस्तानशी चर्चा करण्याशिवाय इतर कुठलाही पर्याय नाही', असं अब्दुल्ला म्हणाले.