श्रीनगर: ग्रेनेड हल्ल्यात एका नागरिकाचा मृत्यू

मटा ऑनलाइन वृत्त। श्रीनगर

श्रीनगरमधील खानयार पोलीस स्टेशनवर काही हल्लेखोरांनी केलेल्या ग्रेनेड हल्ल्यात एका नागरिकांचा मृत्यू झाला आहे. याबरोबर या हल्ल्यात ४ पोलीस कर्मचारी आणि एक नागरिक गंभीर जखमी झाले आहेत. जखमी पोलीस कर्मचाऱ्यांना नजिकच्या हॉस्पिटलमध्ये दाखल करण्यात आले आहे.

पोलीस स्टेशनवर हल्ला केल्यानंतर हे हल्लेखोर चपळाईने फरार झाले. या हल्ल्यानंतर तातडीने पोलीस आणि सुरक्षा दलाच्या जवानांनी परिसरात शोध मोहिम सुरू केली आहे.

यापूर्वी २ एप्रिलला जुन्या शहरातील नौहट्टा भागात दहशतवाद्यांनी ग्रेनेड हल्ला केला होता. या हल्ल्यात एका पोलीस कर्मचाऱ्याचा मृत्यू झाला होता, तर इतर १४ जखमी झाले होते.

विशेष म्हणजे कालच (शनिवारी) काश्मीर खोऱ्यात मोबाइल इंटरनेट सेवा सुरू करण्यात आली होती. तथापि, फेसबुक, ट्विटर, व्हॉट्सअपस, व्हीचॅट, गूगल प्लस, यू-ट्यूब, स्नॅपचॅट आणि फ्लिकर अशा साइट्सवर खोऱ्यात अजूनही बंदी कायम आहे. दहशतवाद्यांशी चकमक सुरू असताना दगडफेक करण्यासाठी तरुणांना गोळा करता यावे यासाठी सोशल नेटवर्किंगचा वापर होत होता.

दरम्यानच्या काळात गुप्तचर यंत्रणांनी दगडफेक करणाऱ्यांना सूचना आणि माहिती देणारे तब्बल ३०० व्हॉट्सअप ग्रूप बंद करुन टाकले होते.