रेल्वेत जमावाच्या मारहाणीत एकाचा मृत्यू

मटा ऑनलाइन वृत्त । नवी दिल्ली

हरयाणात धावत्या रेल्वेत जमावाने चौघांना केलेल्या मारहाणीत एका अल्पवयीन मुलाचा मृत्यू झाला. रेल्वेत मारहाण केल्यानंतर जमावाने चौघांना दिल्लीजवळील असावती रेल्वे स्थानकावर फेकले. उपचारासाठी रुग्णालयात दाखल केल्यानंतर तिथे १६ वर्षीय मुलाचा मृत्यू झाला.

दिल्लीहून निघालेल्या रेल्वेत गुरुवारी ही घटना घडली. जुनैद, हसीब, शाकिर आणि मोहसीन यांच्यावर जमावाने हल्ला केला. त्यापैकी रुग्णालयात उपचारासाठी दाखल करण्यात आलेल्या जुनैदचा मृत्यू झाला. तर, अन्य तीन जण गंभीर जखमी झाले आहेत. या घटनेतील पीडित मोहसीन याने सांगितले की, तीन चुलत भावांसोबत ईदनिमित्तच्या खरेदीसाठी दिल्लीत गेलो होतो. तिथून पुन्हा हरियाणातील आपल्या गावी येत असताना रेल्वेत मारहाण झाली. पंधरा जणांच्या गटाने बसण्यासाठी जागा मागितली होती. मात्र, त्याठिकाणी आम्ही बसल्यामुळे उठण्यास नकार दिला. त्यानंतर या जमावाने धार्मिक टिप्पणी करत तुम्ही देशद्रोही आहात असं मारहाण करण्यास सुरूवात केली. त्यानंतर मारहाण करणाऱ्या जमावात आणखी काही जण सामिल झाली असल्याचे मोहसिनने सांगितले. या दरम्यान, साखळी खेचून रेल्वे रोखण्याचा प्रयत्न करण्यात आला. मात्र, रेल्वे थांबली नसल्याचे मोहसिनने म्हंटले. रेल्वे पोलिसांकडे मदत मागण्यासाठी आपात्कालीन क्रमांकावर संपर्क साधण्याचा प्रयत्न करण्यात आला होता. मात्र, त्याचाही काही उपयोग झाला नसल्याचे मोहसिनने सांगितले.