opposition leaders : 'शरद पवारांच्या निवासस्थानी जनतेने नाकारलेल्यांची बैठक'

नवी दिल्लीः राष्ट्रवादी काँग्रेसचे अध्यक्ष शरद पवार यांच्या ( sharad pawar ) राजधानी दिल्लीतील निवासस्थानी विरोधी पक्षातील नेत्यांची मोठी बैठक झाली. केंद्रातील सत्ताधारी भाजपविरोधात तिसरी आघाडी बनवण्याची तयारी म्हणून या बैठकीकडे बघितलं जातंय. पण या बैठकीला कुठलंही महत्त्व न देत भाजपने विरोधकांवर निशाना साधला आहे. ज्यांना जनता सतत नाकारत आली आहे, त्यांच्या अशा बैठका होणं यात काही नवीन नाही, अशी टीका भाजपने केली आहे.

शरद पवारांच्या निवासस्थानी झालेल्या बैठकीत तृणमूल काँग्रेस, समाजवादी पार्टी, आम आदमी पार्टी आणि राष्ट्रीय लोकदलासह अनेक विरोधी पक्ष आणि डाव्या पक्षातील नेते उपस्थित होते. या बैठकीवरून भाजप खासदार मिनाक्षी लेखी ( Minakshi Lekhi ) यांनी विरोधकांवर टीका केली. जनतेने नाकारलेल्यांची बैठक झाली, असं लेखी म्हणाल्या.

निवडणूक रणनीतीकार प्रशांत किशोर यांचा उल्लेख टाळत लेखी यांनी त्यांच्यावरही टीका केली. जनतेने सतत नाकरालेल्या नेत्यांच्या अशाच बैठका होत असतात. यात काही नावीन्य नाही. पण अशा काही कंपन्या आहेत, ज्यांचा निवडणुकांमुळे फायदा होतो. ते प्रत्येक नेत्याला पंतप्रधानपदाचा उमेदवार म्हणून मांडण्याचा प्रयत्न करत असतात. अशा दिवास्वप्न पाहण्यापासून रोखू शकत नाही, असा टोला लेखी यांनी लगावला.

दिल्लीतील विरोधी पक्षांच्या बैठकीवरून घोळ? बैठकीनंतर राष्ट्रवादीचे स्पष्टीकरण

पवारांच्या निवासस्थानी झालेल्या बैठकीत कोण-कोण उपस्थित?

तृणमूल काँग्रेसचे नेते आणि माजी केंद्रीय अर्थमंत्री यशवंत सिन्हा, समाजवादी पार्टीचे घनश्याम तिवारी, राष्ट्रीय लोकदलाचे अध्यक्ष जयंत चौधरी, आम आदमी पार्टीचे सुशील गुप्ता, भाकपचे बिनय विस्वाम आणि माकपचे निलोत्पल बसु हे पवारांच्या घरी बैठकीसाठी आले होते. प्रसिद्ध गीतकार जावेद अख्तरही या बैठकीत होते. नॅशनल कॉन्फरन्सचे नेते आणि जम्मू-काश्मीरचे माजी मुख्यमंत्री फारुक अब्दुल्ला, माजी काँग्रेस नेते संजय झा आणि संयुक्त जनता दलाचे नेते पवन वर्माही बैठकीत उपस्थित होते. याशिवाय माजी न्यायमूर्ती ए. पी. शहा, आणि के. सी. सिंहही होते.

Sharad Pawar: 'शरद पवार तिसऱ्या आघाडीच्या बैठकीचं यजमानपद भूषवणार नाहीत'