वृत्तसंस्था, जयपूर
ऑक्सफर्ड शब्दकोशाने 'नारीशक्ती'चा सन्मान करून या भारतीय शब्दाचा समावेश त्यांच्या शब्दकोशात केला आहे. जयपूर येथे सुरू असलेल्या जयपूर लिटफेस्टमध्ये या शब्दाचा समावेश ऑक्सफर्ड शब्दकोशात करण्यात येत असल्याची घोषणा करण्यात आली.
दरवर्षी, हिंदी भाषेतील विविध शब्द, जे संवादात वापरले जातात, त्यांचा समावेश ऑक्सफर्ड शब्दकोशात केला जातो. त्यानुसार २०१८ मध्ये 'नारीशक्ती'या शब्दाचा समावेश शब्दकोशात केला आहे. 'नारी'चा अर्थ महिला असून, 'शक्ती'चा अर्थ ताकद असा आहे. देशभरात हा शब्द विविध मार्गांनी वापरला जात असून, सरकारी योजनांमध्येही त्याचा वापर केला जातो. महिलांचे अधिकार बळकट करण्यासाठी नागरी समाज, स्वयंसेवी संस्था आणि विद्यापीठेही 'नारीशक्ती' शब्दाचा वापर करतात. त्यामुळेच ऑक्सफर्ड शब्दकोशाने यंदा या शब्दाची निवड केली आहे. त्यासाठी भाषा तज्ज्ञांच्या सल्लागार समितीची मदत घेण्यात आली. या समितीत नमिता गोखले, रणधीर ठाकूर, कृतिका अग्रवाल आणि सौरभ द्विवेदी यांचा समावेश होता.