चहाचा भाव ऐकून मी धास्तावलोय: चिदंबरम

चेन्नई: देशातील वाढत्या महागाईमुळे ज्येष्ठ काँग्रेस नेते, माजी केंद्रीय अर्थमंत्री पी. चिदंबरमही हैराण झाले आहेत. चेन्नई विमानतळावरील चहा आणि कॉफीचे भाव ऐकून त्यांना धक्काच बसला असून वाढत्या महागाईवर त्यांनी चिंता व्यक्त केली आहे. 'विमानतळावर चहाची किंमत १३५ रुपये आणि कॉफीची किंमत १८० रुपये असल्याचं पाहून मी घाबरून गेलो आहे. धास्तावलो आहे. कदाचित मी आउटडेटेडही झालो असेल,' असं टि्वट चिदंबरम यांनी केलं आहे.

'चेन्नई विमानतळावर मी चहाची ऑर्डर दिली होती. गरम पाणी आणि टी बॅग मला देण्यात आली. त्याची किंमत होती १३५ रुपये. भयंकर आहे. मी चहा घेण्यास नकार दिला. मी बरोबर आहे की चुकीचा?,' असं चिदंबरम यांनी टि्वटमध्ये म्हटलं आहे. त्यानंतर त्यांनी आणखी एक टि्वट केलं. 'विमानतळावर कॉफीची किंमत १८० रुपये आहे. मी विचारलं, 'कोण घेतं ही कॉफी'. तर उत्तर होतं, 'बरेच लोक.' खरंच मी आऊटडेटेड झालोय का?,' असा सवालही त्यांनी केला आहे.