राम माधव यांचा मुखभंग

वृत्तसंस्था, नवी दिल्ली/श्रीनगर

जम्मू काश्मीरमधील दोन पारंपरिक प्रतिस्पर्धी पक्ष नॅशनल कॉन्फरन्स आणि पीपल्स डेमोक्रॅटिक पार्टी (पीडीपी) एकत्र येण्यामागे पाकिस्तानचा हात असल्याचा आरोप भारतीय जनता पक्षाचे प्रदेश प्रभारी राम माधव यांनी केला होता. मात्र, हा आरोप सिद्ध करण्याचे आव्हान नॅशनल कॉन्फरन्सचे नेते उमर अब्दुल्ला यांनी केंद्र सरकार आणि राम माधव यांना दिल्यानंतर माधव यांनी शरणागती पत्करत आरोप मागे घेतला.

सीमेपलीकडून सूचना आल्यामुळेच पीडीपी आणि एनसी यांनी स्थानिक स्वराज्य संस्थांच्या निवडणुकीवर बहिष्कार घातला होता. आताही कदाचित पलीकडून ताजा आदेश आल्यामुळेच हे दोन्ही पक्ष एकत्र येऊन सरकार स्थापनेचा प्रयत्न करीत असावेत. त्यामुळेच राज्यपालांना या साऱ्या विषयात हस्तक्षेप करणे भाग पडले, असा आरोप राम माधव यांनी एएनआय या वृत्तसंस्थेशी बोलताना केला होता.

'रीसर्च अँड अनालिसिस विंग (रॉ), राष्ट्रीय तपास यंत्रणा (एनआयए) आणि इंटेलिजन्स ब्युरोसारख्या यंत्रणा तुमच्या दिमतीला आहेत. तेव्हा तुमचा आरोप सिद्ध करून दाखवा,' असे आव्हान उमर अब्दुल्ला यांनी दिले होते. तुमचा आरोप म्हणजे देशासाठी बलिदान दिलेल्या माझ्या तीन हजार कार्यकर्त्यांचा अपमान आहे. तुमच्या पक्षाच्या कार्यकर्त्यांपेक्षा अधिक संख्येने माझ्या कार्यकर्त्यांनी अधिक त्याग केला आहे. त्यामुळे त्याग आणि आम्ही काय करावे, यावर तुम्ही व्याख्यान देऊ नका, अशा शब्दांत उमर यांनी राम माधव यांना श्रीनरमध्ये पत्रकार परिषद घेऊन सुनावले. माधव यांनी माफी मागावी, अशी अपेक्षाही उमर यांनी व्यक्त केली. त्यानंतर काही वेळात माधव यांनी आपण आरोप मागे घेत असल्याचे ट्विटरवरून उमर यांना कळवले.

कोट

जम्मू आणि काश्मीरमध्ये सरकार स्थापन करण्यासाठी कुणापाशीही बहुमत नव्हते आणि दोन्ही बाजूंनी आमदारांचा घोडेबाजार होत असल्याची माहिती मिळाली होती. मेहबूबा मुफ्ती आणि ओमर अब्दुल्ला यांनी विधानसभा विसर्जित करण्याची यापूर्वीही मागणी केली होती. परिस्थिती बिघडत चालल्याने विधानसभा विसर्जित केली.

- सत्यपाल मलिक, राज्यपाल