गुजरात निवडणुकीत पाकचा हस्तक्षेप

वृत्तसंस्था, पालनपूर

गुजरात विधानसभा निवडणुकीत पाकिस्तान हस्तक्षेप करत आहे, असा आरोप पंतप्रधान नरेंद्र मोदी यांनी रविवारी केला. शेजारील देशातील नेत्यांना अलीकडील काळात कोण भेटले होते, याचे स्पष्टीकरण काँग्रेसच्या वरिष्ठ नेत्यांनी द्यावे, अशी मागणीही त्यांनी केली. पालनपूर येथील प्रचारसभेत बोलताना त्यांनी काँग्रेसवर निशाणा साधला.

ज्येष्ठ काँग्रेस नेते अहमद पटेल यांनी गुजरातचे मुख्यमंत्री व्हावे, यासाठी पाकिस्तानी लष्करातील माजी महासंचालक सरदार अर्शद रफीक यांनी केलेल्या आवाहनाबद्दल पंतप्रधान मोदी यांनी या वेळी सवाल उपस्थित केला. मणिशंकर अय्यर यांनी आपल्याला नीच म्हटले. त्याच्या आदल्या दिवशी पाकिस्तानातील नेत्यांची काँग्रेस नेत्यांसोबत बैठक झाल्याचा आरोप मोदी यांनी केला.

‘मणिशंकर अय्यर यांच्या घरी झालेल्या बैठकीबद्दल माध्यमांत काल बातम्या आल्या आहेत. या बैठकीला पाकिस्तानी उच्चायुक्त, पाकिस्तानचे माजी परराष्ट्रमंत्री, भारताचे माजी उपराष्ट्रपती आणि माजी पंतप्रधान मनमोहनसिंग उपस्थित होते,’ असा दावा मोदी यांनी केला आहे. अय्यर यांच्या घरी झालेली ही बैठक सुमारे तीन तास चालल्याचेही मोदी म्हणाले. ‘बैठकीच्या दुसऱ्या दिवशी मणिशंकर अय्यर यांनी मोदी नीच असल्याचे म्हटले. हा गंभीर प्रकार आहे,’ असे मोदी म्हणाले.

‘एकीकडे पाकिस्तानी लष्कराचे माजी महासंचालक गुजरात निवडणुकीत हस्तक्षेप करत आहेत, तर दुसरीकडे पाकिस्तानी लोक अय्यर यांच्या घरी बैठक घेतात. या बैठकीनंतर गुजरातची जनता, मागास समुदाय, गरीब लोक आणि मोदी यांचा अपमान केला जातो. अशा घटनांमुळे संशय निर्माण होतो असे तुम्हाला वाटते का,’ असा सवाल मोदी यांनी केला. नेमके काय झाले याची माहिती काँग्रेसने जनतेला द्यावी, असेही मोदी म्हणाले.