'अमेरिकेच्या सर्वात मोठ्या शत्रूस पाकिस्तानचा आश्रय'

मटा ऑनलाइन वृत्त। नवी दिल्ली

'अल-कायदा' या दहशतवादी संघटनेचा म्होरक्या अयमान अल-जवाहिरी याने पाकिस्तानात आश्रय घेतला असून पाकिस्ताची गुप्तचर संस्था 'आयएसआय'चे जवाहिरीला संरक्षण असल्याचे खळबळजनक वृत्त अमेरिकेतील 'न्यूजवीक' या साप्ताहिकाने प्रसिद्ध केले आहे. अल-जवाहिरी पाकिस्तानात कराचीमध्ये राहत असावा अशी शक्यताही या वृत्तात व्यक्त केली आहे. विशेष म्हणजे आपल्या मरणापूर्वी अमेरिकेत मोठा दहशतवादी हल्ला करण्याची जवाहिरीची 'अंतिम इच्छा' आहे. 'न्यूजवीक'ने अनेक सूत्रांच्या हवाल्याने हे वृत्त प्रसिद्ध केले आहे.

योबरोबर ओसामा बिन लादेनचा मुलगा महजा बिन लादेन हा देखील पाकिस्तानात असून त्यालाही आयएसआयचे संरक्षण असल्याचे पाकिस्तानमधील एका माजी वरिष्ठ अधिकाऱ्याने 'न्यूजवीक'शी बोलताना म्हटले आहे. 'न्यूजवीक'ने ज्या सूत्रांच्या हवाल्याने हे वृत्त प्रसिद्ध केले आहे ती सूत्रे अत्यंत विश्वसनीय असल्याचे 'न्यूजवीक'ने म्हटले आहे.

ओसामा बिन लादेनचा २६ वर्षीय मुलगा हमजा हा 'आयएसआय'च्या संरक्षणात पाकिस्तानातच राहतो याची आपल्याला १०० टक्के खात्री असल्याचे पाकिस्तानच्या एका माजी वरिष्ठ अधिकाऱ्याने न्यूजवीकशी बोलताना म्हटले आहे.

अमेरिकेने २००१ मध्ये अफगाणिस्तानात अल-कायदाचा निपात केला होता. तेव्हापासूनच पाकिस्तानी गुप्तचर संस्था 'आयएसआय' अल-जवाहिरीचे संरक्षण करत आहेत अशी माहिती सूत्रांनी दिली आहे.

अल-जवाहिरी पाकिस्तानात लपला असल्याची माहिती अमेरिकेला असण्याची शक्यता आहे. याचे कारण म्हणजे गेल्या वर्षी ओबामा सरकारने अल-जवाहिरीवर ड्रोन हल्ला केला होता. मात्र या हल्ल्यात तो थोडक्यात बचावला होता. ज्या खोलीत अल-जवाहिरी थांबला होता, त्या खोलीच्या बाजूच्याच खोलीवर ड्रोन हल्ला झाल्याची माहिती एका दहशतवाद्याने न्यूजवीकशी बोलताना दिली आहे.

अल-जवाहिरीवर २००१ सालापासून अनेक ड्रोन हल्ले झाले आहेत, मात्र तो प्रत्येकवेळी बचावल्याची माहिती अफगाण-तालिबानच्या एका नेत्याने 'न्यूजवीक'शी बोलताना दिली आहे. अल-जवाहिरी आपली ओळख 'विश्वशांतीसमोरील संकट' अशी होऊ नये अशा प्रयत्नात होता. त्या दृष्टीने तो अफगाणिस्तान सरकारशी शांतता करारासाठी वाटाघाटी करण्याच्याही प्रयत्नात होता. यामुळे अल-जवाहिरी आपल्याच क्षेत्रात लोकप्रिय होऊ शकला नाही असे म्हटले जात आहे.

'अल-कायदा' या दहशतवादी संघटनेत आजही मोठी ताकद असून या संघटनेत अमेरिकेवर पुन्हा दहशतवादी हल्ला करण्याची क्षमता असल्याचे अभ्यासकांचे म्हणणे आहे. डोनाल्ड ट्रम्प यांना देखील याची कल्पना असल्याचे बोलले जात आहे.

'अल-कायदा'चा आजही मोठा धोका असल्याचे अमेरिकेच्या गुप्तचर संस्थेत ३० वर्षे काम केलेले ब्रुस रिडेल यांचे मत आहे. २०१४ मध्ये 'अल-कायदा'ने पाकिस्तानी युद्धनौकेचे अपहरण करून हिंदी महासागरात अमेरिकी आणि भारतीय जहाजांवर हल्ला करण्याचा कट रचला होता अशी माहितीही रिडेल यांनी दिली आहे.

याबाबत अधिक माहिती देतना रिडेल पुढे म्हणाले, 'तुम्ही कल्पना करा, स्फोटके लादलेल्या किंवा अण्वस्त्रधारी पाकिस्तानी युद्धनौकेने जर अमेरिकी विमानवाहू युद्धनौकेला बुडवले तर जगाचा इतिहासच बदलून जाईल.'